Prezident kelesi jyldy "Jumysshy mamandyqtar jyly" dep jariialady, - dep habarlaidy Dalanews.kz.
«Kásiptik bilim berý salasyna reforma jasaý – airyqsha ózekti másele. Bul – ekonomikanyń ósimin qamtamasyz etý jáne investitsiialyq tartymdylyǵyn arttyrý úshin asa qajet qadam.
Men 2025 jyldy Jumysshy mamandyqtary jyly dep jariialaimyn. Osy ýaqyt ishinde tehnikalyq jáne kásibi bilim berý júiesin reformalaý qajet. Sondai-aq biz jumysshy mamandyqtaryn dáripteý arqyly qoǵamda eńbekqor jáne naǵyz maman bolý ideiasyn nasihattaimyz.
Adal ári tabandy eńbegimen tabysqa jetken adamdar qashanda qurmetti, syily bolýy kerek. Bul biz usynyp otyrǵan «Adal azamat – Adal eńbek – Adal tabys» qaǵidatyna tolyq sai keledi. Bir sózben aitqanda, bizdiń qoǵamda eńbekqorlyq, kásibilik siiaqty qasietter óte joǵary baǵalanýǵa tiis. Óz kásibin jetik meńgergen mamandar ult sapasyn arttyrady. Sondyqtan biz eńbek adamynyń mártebesin kóterip jatyrmyz. Bul baǵyttaǵy jumys toqtamaidy, jalǵasa beredi.
Jumystyń jamany joq, kez kelgen eńbek – qadirli. Eń bastysy, árkim jaýapkershilikti tereń sezinip, óz mindetin sapaly atqarýǵa tiis. Sonda ǵana elimiz damýdyń sara jolyna túsedi.
Halqymyzda «Jumystyń kózin tapqan bailyqtyń ózin tabady» degen sóz bar. Kásibine adal ári jaýapkershilikpen qaraǵan adam qashanda laiyqty baǵasyn alady. Bul túsinikti qoǵam sanasyna sińirý qajet. Azamattarǵa qurmetti ataq berýdegi túpki maqsatymyz da – osy. Buǵan deiin muǵalimderge, dárigerlerge jáne mádeniet qairatkerlerine osyndai ataqtar berile bastady. Bul – óte jaqsy bastama, onyń aiasyn keńeitý kerek», - dedi prezident Joldaýynda.
