Byltyr Memleket basshysy Qasym-Jomart Toqaevtyń tapsyrmasy boıynsha Sý resýrstary jáne ırrıgasıa mınıstrligi janynan Ulttyq gıdrogeologıa qyzmeti qurylǵan bolatyn. Atalǵan vedmostvalar elimizdegi ırrıgasıa júıesin jańǵyrtyp, tıimdi paıdalanýdyń josparyn qurýy kerek bolatyn, – dep habarlaıdy Dalanews.kz.
Prezıdent óz Joldaýynda elimizdiń sý resýrstarymen jeke mınıstrlik aınalysýy kerek ekenin qadap turyp aıtqan bolatyn.
– Elimiz úshin sýdyń mańyzy munaı, gaz nemese metaldan kem emes. Sý sharýashylyǵy júıesin tıimdi damytý máselesimen derbes mekeme aınalysýy qajet dep sanaımyn. Sondyqtan Sý resýrstary jáne ırrıgasıa mınıstrligi qurylady. Mınıstrliktiń aıasynda Ulttyq gıdrogeologıa qyzmeti qaıta jumys isteıtin bolady, – dedi Memleket basshysy Qasym-Jomart Toqaev Qazaqstan halqyna arnaǵan Joldaýynda.
Qazirgi ýaqytta atalǵan Qyzmetti qaıta qurý máselesimen aınalysatyn eki basqarmasy bar Departament quryldy. QR Úkimetiniń qaraýyna usynylatyn uıymdastyrý qurylymy men jarǵylyq qujattar ázirlendi.
Sý resýrstary jáne ırrıgasıa mınıstrliginiń usynysyna sáıkes, Ulttyq gıdrogeologıa qyzmeti jer asty sýlaryn basqarý, izdeý-barlaý jumystary jáne olardyń memlekettik monıtorıńi salasynda memlekettik saıasatty júrgizý úshin uıymdastyrýshylyq jáne basqa da qajetti ókilettikterge ıe bolady. Jer asty sýlaryn utymdy paıdalaný máseleleri erekshe baqylaýda bolady.
Sý resýrstary jáne ırrıgasıa mınıstri Nurjan Nurjigitov boljam boıynsha Qazaqstandaǵy jer asty sýlarynyń qory shamamen 40 tekshe kılometrdi quraıtynyn, onyń 15 tekshe kılometri qazirgi tańda paıdalanýǵa daıyn ekenin atap ótti. Búginde el ekonomıkasynda bul resýrstardyń 7-10%-yn ǵana qoldanylady.
Mınıstrliktiń josparynda – aýyzsýmen qamtamasyz etý, aýyl sharýashylyǵy jerlerin sýarý jáne jaıylymdyq mal sharýashylyǵyn qoldaý úshin jer asty sýlaryn belsendi túrde paıdalaný, bul rette qorlardyń sarqylýyna jáne lastanýyna jol bermeý úshin qatań baqylaý qamtamasyz etiletin bolady.
Prezıdenttiń bastamasy Qazaqstannyń ornyqty damýy úshin sý resýrstaryn basqarýdyń strategıalyq mańyzyn kórsetedi, bul elimizdiń ishki qajettilikterine jáne jahandyq ekologıalyq syn-tegeýrinderge sáıkes keledi.
