Memleket basshysynyń «Ádiletti Qazaqstannyń ekonomıkalyq baǵdary» atty Qazaqstan halqyna Joldaýynda qoıǵan tapsyrmasyn oryndaý maqsatynda Úkimet «Bıznestiń jol kartasy» jáne «Qarapaıym zattar ekonomıkasy» baǵdarlamalaryn biriktirgen Shaǵyn jáne orta kásipkerlikti qoldaý men damytýǵa arnalǵan keshendi baǵdarlamany ázirlep, qabyldady.
Kásipkerlikti damytý salasynda memleket júrgizip otyrǵan saıasattyń qazirgi kún tártibi men myqty, básekege qabiletti kásiporyndar qurý qajettigin eskere otyryp, jańa baǵdarlama aıasynda tıimdi jobalarǵa qoldaý kórsetý kózdelgen. Sonymen qatar jańa jobalardy sýbsıdıalaý úshin búdjetti bólý negizinen óńdeý ónerkásibi salasyndaǵy (shamamen 50%) kásiporyndar arasynda júzege asyrylady.
Sondaı-aq búdjetke túsetin júktemeni azaıtý úshin qyzmet kórsetý salasyndaǵy jobalardy sýbsıdıalaý merzimi 5 jyldan 3 jylǵa deıin qysqartyldy. SHOB jobalaryn sýbsıdıalaýdyń saralanǵan ádisi qarastyrylǵan, bul kezeń-kezeńimen naryqtyq jaǵdaılarǵa kóshirýdi kózdeıdi. Sýbsıdıalaýǵa jatatyn jekelegen qyzmet salalary ońtaılandyryldy.
Nesıeler boıynsha kepildik berý quraly keńeıtildi, atap aıtqanda, kepildikter somalary ulǵaıtyldy, bıznes sýbektilerine 1 mlrd teńgeden asatyn nesıe somalaryna naryqtyq sharttar boıynsha kepildik alý múmkindigi berildi.
Buǵan qosa, baǵdarlamada memlekettik qoldaýdyń balamaly quraly retinde sındıkattalǵan nesıeleý qarastyrylǵan, ol bir mezgilde birneshe bank arqyly 15 mlrd teńgege deıin iri jobalardy qarjylandyrýdy kózdeıdi.
Sondaı-aq oblıgasıalyq qaryzdar berý sharttary edáýir keńeıtildi. Máselen, emıtent-kásipker oblıgasıa shyǵarý kezinde kýpondyq syıaqy mólsherlemesine sýbsıdıa alyp, 5 jyl merzimge deıin 6% mólsherlememen 5 mlrd teńgege deıin qarjylandyrýdy tarta alady.
Bıylǵy 6 aıda jańartylǵan baǵdarlama aıasynda sýbsıdıalar men kepildikter túrindegi qoldaý sharalarymen Qazaqstanda shamamen 14 myń bıznes jobasy qamtyldy: sýbsıdıalaý boıynsha – 566 mlrd teńgege 8 624 joba, kepildik berý boıynsha – 178,9 mlrd teńgege 5 381 joba.
Jaqyn arada óndiristiń tehnologıalyq kúrdeliligine qaraı memlekettik qoldaýdyń saralanǵan tetikterin engizý josparlanýda. Joǵary tehnologıalyq daıyn ónim shyǵaratyn kásipkerler úshin qoldaý sharalary uzaq merzimge arzandatylǵan nesıe berýdi qamtıtyn bolady.
Atalǵan tetikter bıznesti maqsatty ári tıimdi qoldaýdy qamtamasyz etýge múmkindik beredi, bul, óz kezeginde, turaqty ekonomıkalyq ósimge jáne elimizdiń básekege qabilettiligin arttyrýǵa yqpal etedi.
