Atap aitsaq, el birligi men turaqtylyǵynan bastap, áleýmettik-ekonomikalyq salalardyń barlyǵyn qamti otyryp, azamattardyq quqyqtary men qaýipsizdigin qamtamasyz etý, ultaralyq tatýlyq, til máselelerine de erekshe den qoiylǵan.
Prezident Joldaýynda aitylǵan árbir sózge den qoia otyryp, «Azamattardyń barlyq syndarly ótinish-tilekterin jedel ári tiimdi qarastyratyn «Halyq únine qulaq asatyn memleket» tujyrymdamasyn iske asyrý – bárimizge ortaq mindet. Bilik pen qoǵam arasynda turaqty dialog ornatý arqyly ǵana qazirgi geosaiasi ahýalǵa beiimdelgen úilesimdi memleket qalyptastyrýǵa bolady.», - degen tujyrymdy da tushymdy oiy ózgelerge oi salarlyq dúnie boldy. Shynymen, túrli deńgeilerdegi ákimder, mekeme basshylary osy ustanymmen jumys jasap, qarapaiym halyq, qyzmetker, jumysshylarmen tize qosa otyryp, kez-kelgen isti aqyldasa otyryp eńbek etse, utarymyz kóp.
Al jalpy Joldaýdaǵy ózimniń janyma erekshe jaqyn otandyq bilim jaily aitqan oń pikirleri Qazaqstannyń barlyq ustazdar qaýymy tarapynan qoldaý tabaryna senimim mol.
Áleýmettik salada kóptegen baǵyttarǵa basa mán berý kerektigin atap ótken prezident bilim berý sapasyn jaqsartýdy nazardyn tys qaldyrmady. «Biz oqýshylardyń qabiletin aiqyndap, kásibi baǵyt-baǵdar berý saiasatyna kóshýimiz qajet.
Bul saiasat orta bilim berýdiń ulttyq standartynyń negizi bolýy tiis.», - degen Joldaýdaǵy Memleket basshysynyń sózderi Nazarbaev Ziiatkerlik mektepteriniń negizgi ustanymdarymen úndes keledi. Óitkeni, biz balanyń qalaýyna sai, oqýshylardy ózderi beiim mamandyqtarǵa erte jastan baǵyttaimyz.
Kún saiyn tyń jańalyqqa toly búgingi qoǵamda bilim salasy da zaman talabyna sai jańǵyryp otyrady. Álemdik kóshke ilesýdiń birden-bir joly bilim alý. Ol úshin elimizdegi oqý oryndaryn támamdaý azdyq etedi. Bul aýyl, qala jastaryna ortaq jait. Osyny eskergen Qasym-Jomart Kemeluly daryndy aýyl jastaryn iriktep, otandyq jáne sheteldik joǵary oqý oryndaryna daiyndaý kerektigin tilge tiek etti.
Elimizdegi taǵy bir másele – az qamtylǵan jáne kóp balaly otbasylardy qoldaý. Úkimetke Daryndy balanyń qabiletin damytýdyń jol kartasyn ázirleýdi tapsyrǵan memleket basshysy Úkimet pen ákimderdiń osyndai balalardyń úiirmeler men ortalyqtarǵa, jazǵy lagerlerge barýy úshin múmkindik jasaýy kerektigin de qadap aitty.
Óz sózinde joǵary bilimniń, oqýlyqtardyń sapasyna syn aitqan Prezident muǵalimder men oqytýshylardyń áleýmettik jaǵdaiyn jaqsartpasaq, bul sharalar júzege asa qoimaityndyǵyn eske saldy.
Bul jolǵy Joldaý – aitylǵan, kóterilgen máselelerdi, tapsyrmalardy qysqa merzimde oryndaýǵa baǵyttalǵan jumystardyń reti. Endeshe, el bolyp atsalysyp, nátijeli júzege asýyna bel sheshe kiriselik.
Baǵdan Qaiyrjanov,
Semei qalasyndaǵy fizika –matematika baǵytyndaǵy
Nazarbaev Ziiatkerlik mektebiniń direktory
