Prezident ardager jýrnalisti 100 jasqa tolǵan mereitoiymen quttyqtady
Óz kezeginde QR Aqparat jáne qoǵamdyq damý ministri Aida Balaeva Memleket basshysynyń Alǵys hatynda: «Siz ǵibratty ǵumyr jolyńyzdyń búgingi bir ǵasyrlyq belesine úlkenge de, jasqa da úlgi bolatyn adami biik bolmysyńyzben jetip otyrsyz. Otandyq baspasóz salasynda kóp jyl qajyrly qyzmet etip, elimizdiń buqaralyq aqparat quraldaryn damytýǵa orasan zor eńbek sińirdińiz. El igiligi úshin atqarǵan jemisti jumysyńyz úshin Sizge alǵysymdy bildirip, 100 jasqa tolǵan mereitoiyńyzben shyn júrekten quttyqtaimyn. Denińizge saýlyq, áýletińizge amandyq tileimin» – degen Prezidentimizdiń júrekjardy lebizin jetkizdi. Sonymen qatar ministr óz sózinde mereitoi iesine:
– Siz búkil sanaly ǵumyryńyzdy – qazaq jýrnalistikasynyń damýyna arnadyńyz. Sondyqtan Ózińizdiń tól salańyz – baspasóz zamanmen birge ósip-órkendep, óz ornyn joǵaltpai keledi. Munyń ózi eń aldymen ózińizdei ardager-jýrnalister salǵan sara joldyń jemisti jalǵasy ekeni daýsyz. Sondyqtan búgingi mereitoiyńyz áýletińizdiń ǵana emes, bizdiń Ulttyq jýrnalistikanyń ortaq qýanyshy, – dep atap ótti.
Kezdesýde Hanymbúbi Aqjolova Memleket basshysynyń ystyq yqylasty quttyqtaýyna rizashylyǵyn bildire otyryp «Bir ǵasyr biiginde» atty jańa kitaptyń bir danasyn Prezidentke joldady.
Hanymbúbi Aqjolova Almaty oblysynda dúniege kelgen. Qazaqstanǵa eńbegi sińgen mádeniet qairatkeri, ardager jýrnalist. 1944 jyly QazMÝ-diń filologiia fakýltetiniń jýrnalistika bólimine oqýǵa túsip, ádebiettanýshy, professor Músilim Bazarbaev, ataqty ǵalym, jazýshy-jýrnalist Muqan Mamajanov, jazýshy Kemel Toqaev syndy bolashaq tanymal tulǵalarmen qatar oqyp, bilim alǵan.
1949 jyly bilim ordasyn qyzyl diplommen támamdap, «Sotsialistik Qazaqstan» («Egemen Qazaqstan») respýblikalyq gazetinde uzaq jyldar boiy qyzmet atqarǵan. Keiinnen týǵan jerine oralyp, Jambyl aýdandyq «Bolsheviktik jol» («Ekpindi eńbek») gazetine redaktor bolyp taǵaiyndalyp, qajyrly eńbek etedi.
1971 jyly zeinet jasyna jetip, «Qazaqstanǵa eńbegi sińgen mádeniet qairatkeri» qurmetti ataǵyn ielengen. Almaty oblysynyń qurmetti azamaty.
