VI Dúniejúzilik kóshpendiler oiyndarynda toǵyzqumalaqtan Qazaqstan quramasynyń namysyn abyroimen qorǵaǵan sportshylar men olardyń bapkerleri memlekettik nagradalarmen marapattaldy, dep habarlaidy dalanews.kz.
Búgin Astanadaǵy Táýelsizdik saraiynda Qazaqstan Prezidenti Qasym-Jomart Toqaev VI Dúniejúzilik kóshpendiler oiyndarynyń jeńimpazdary men júldegerlerin, sondai-aq olardyń jattyqtyrýshylaryn quttyqtap, úzdikterge memlekettik nagradalar tabystady. Saltanatty jiynda toǵyzqumalaqtyń damýyna úles qosyp júrgen birqatar maman men sportshynyń eńbegi erekshe ataldy.
«Qurmet» ordenimen toǵyzqumalaqtan Qazaqstan quramasynyń bas jattyqtyrýshysy Ainur Absadyqqyzy Jaqapbaeva, Qazaqstan toǵyzqumalaq federatsiiasynyń bas hatshysy Maqsat Esenbekuly Shotaev, sondai-aq toǵyzqumalaq chempiondary Biǵali Zkriiaev, Azamat Qaidarov jáne Móldir Serikqyzy marapattaldy.
Al «Eren eńbegi úshin» medaline toǵyzqumalaq sheberleri Erasyl Aýtalipov, Aidyn Jakiev jáne Arýjan Salman ie boldy.
Bul marapattar ulttyq ziiatkerlik oiynnyń halyqaralyq arenadaǵy bedelin arttyrýǵa úles qosqan sportshylar men mamandar eńbeginiń joǵary baǵalanǵanyn kórsetedi.
“Jastar sizderge qarap boi túzeidi. Bul – úlken mártebe jáne zor jaýapkershilik. Jeńimpaz, chempion bolý – bir basqa, jeńimpazǵa, chempionǵa laiyq úlgi kórsetý – bir bólek. Jas urpaqty tabandy, qaisar, shydamdy bolýmen qatar, olardy ádepti, mádenietti, tiianaqty bolýǵa úiretý óte mańyzdy. Sonda jastarymyzdyń táni de, jany da saý, sanasy sergek bolady”, – dedi Qasym-Jomart Toqaev.
Aita keteiik VI Dúniejúzilik kóshpendiler oiyndarynda toǵyzqumalaqtan Qazaqstan quramasy joǵary nátije kórsetti. Ulttyq qurama qorjynyna 4 altyn jáne 2 kúmis medal tústi. Odan tys mangaladan 2 altyn jeńip aldy.
Jalpy Qyrǵyzstanda ótken dúbirli dodada Qazaqstan quramasy 74 medal jeńip alyp, onyń 32-sin altynmen tolyqtyrdy. Memleket basshysy sportshylardyń bul jetistigin qazaq halqynyń qaisar rýhy men jeńimpaz bolmysynyń aiqyn kórinisi dep baǵalady.
