Memleket basshysynyń shikizatty tereń óńdeýdi damytý jáne qosylǵan quny joǵary ónim shyǵarýdy ulǵaitý jónindegi tapsyrmalaryn iske asyrý sheńberinde Qazaqstan Respýblikasynyń Úkimeti ónerkásip jáne qurylys ministrligi men "Qazaq Smelter" JShS arasyndaǵy mys qorytý zaýytyn salý jobasy boiynsha investitsiialar týraly kelisimdi maquldady, dep habarlaidy dalanews.kz.
Tiisti qaýlyǵa Premer-ministr Oljas Bektenov qol qoidy.
Jańa óndiris Qaraǵandy oblysynyń Balqash qalasynda júzege asady. Jeke investitsiialardyń jalpy kólemi 750 mlrd teńgeni quraidy. Kásipornynyń qurylysy 2027 jyly bastalady, paidalanýǵa berý 2030 jylǵa josparlanǵan. Zaýyttyń óndiristik qýaty jylyna 300 myń tonna katodty mys, 10 tonna altyn, 300 tonna kúmis jáne 1,5 mln tonnadan astam kúkirt qyshqylyn óndirýge qaýqarly.
Joba 1,2 myńǵa jýyq turaqty jumys ornyn ashýdy kózdeidi. Kásiporyn iske qosylǵan kezde qyzmetkerlerdiń 90%-y basshylyq laýazymdardy qosa alǵanda, qazaqstandyq mamandardy quraityn bolady, aldaǵy bes jyl ishinde olardyń úlesi 95%-ǵa deiin artady. Sondai-aq investor Qaraǵandy oblysynyń oqý oryndarynda 50 stýdentti daiarlaý boiynsha mindettemeler alady.
Jańa qýattardy iske qosý el ishinde mys shikizatyn qaita óńdeý kólemin bir jarym esege arttyryp, jylyna 800 myń tonnadan astam kólemge ulǵaitýǵa múmkindik beredi. Qosylǵan quny joǵary ónimniń eksporty jylyna 460 myń tonnadan 760 myń tonnaǵa deiin ósedi. Sonymen qatar óndiris zamanaýi tehnologiialarmen jáne tsifrlyq sheshimdermen jabdyqtalatyn bolady.
Osy jyldyń alty aiynyń qorytyndysy boiynsha óńdeý ónerkásibindegi óndiris kólemi 9,8%-ǵa ulǵaidy. Ósim mashina jasaý, tamaq jáne himiia ónerkásibi, munai óńdeý, qurylys materialdaryn shyǵarýda jáne basqa da salalarda baiqalady. Osy kezeńde elimizde 232 myń tonna katodty mys óndirildi.
Katodty mys – qosylǵan quny joǵary ónim shyǵarýdyń negizgi shikizaty. Ol elektr kabelderi men jabdyqtaryn, qubyrlardy, qurylys materialdaryn, avtomobil bólshekterin, sondai-aq qola, jez jáne basqa da mys qorytpalaryn óndirýde qoldanylady.
