Polısıa polkovnıginiń uly esirtki qylmysyna qatysty sottaldy

Saǵynysh Sardarova 24 qaz. 2024 08:53 1846

Mańǵystaý oblysynyń qylmystyq ister jónindegi mamandandyrylǵan aýdanaralyq sotynda esirtki qylmysyna qatysty is qaraldy, - dep habarlaıdy Dalanews.kz.

Mańǵystaý oblysynyń qylmystyq ister jónindegi mamandandyrylǵan aýdanaralyq soty málimetinshe, 2024 jylǵy 21 qazanda alqabılerdiń qatysýymen Qylmystyq kodekstiń 297-baby 3-bóliginiń 1,3,5-tarmaqtarymen aıyptalǵan A.-ǵa qatysty, ıaǵnı adamdarmen aldyn ala sóz baılasyp, asa iri mólsherdegi psıhotrop zattardy elektron aqparattyq resýrstardy paıdalaný arqyly zańsyz ótkizý maqsatynda saqtaý deregimen sotqa berilgen qylmystyq is qaraldy.

Memlekettik aıyptaýshy A.-ǵa 11 jylǵa bas bostandyǵynan aıyrý jazasyn taǵaıyndaýdy surady. A. men onyń qorǵaýshylary aqtaýdy surady. İs boıynsha A.-nyń qylmystyq jaýaptylyǵy men jazasyn jeńildetetin ne aýyrlatatyn mán-jaılar anyqtalǵan joq.

"Alqabılerdiń kesimimen A. kináli dep tanylyp, oǵan 10 jylǵa bas bostandyǵynan aıyrý jazasy taǵaıyndaldy. Úkim zańdy kúshine engen joq", - dep jazylǵan habarlamada.

Lada.kz málimetinshe, 10 jylǵa bas bostandyǵynan aıyrylǵan adam - Batys Qazaqstan oblysy polısıa bastyǵynyń orynbasary Talǵat Arynovtyń uly Nurjan Arynov.

2023 jyly polısıa polkovnıginiń uly Telegram messendjeri arqyly psıhotrop zattardy taratýǵa tyrysqany belgili boldy. Bul is Mańǵystaý oblysynyń qylmystyq ister jónindegi mamandandyrylǵan aýdanaralyq sotynda alqabılerdiń qatysýymen qaraldy. 2024 jyly 15 mamyrda Nurjan Arynovqa aqtaý úkimi shyǵaryldy.

Prokýratýra iste tolyq dálel, eki kýágerdiń aıǵaqtary jáne sottalýshynyń kinásin rastaıtyn tergeý áreketteriniń basqa hattamalary jınalǵanyn habarlady. Shildede sot alqasy oblys prokýratýrasynyń ótinishin qarady, osylaısha alqabıler sotynyń aqtaý úkimin joıdy. İs qaıta qaraýǵa jiberildi.