Qyzylordalyq Maǵjan Nalibaev sońǵy ýaqytta perzenthanadan shyǵatyn, qarsy alatyn eshkimi joq áielderge qaiyrymdylyq jasap júr. Ol olardy kútip alyp, jórgek pen gúl syilap, úilerine jetkizip salady, dep habarlaidy Dalanews.kz
Zakon.kz jazǵan materialda qyzyordalyq jigittiń el súisiner áreketi baiandalady. Qazaqstanda perzenthanadan jalǵyzbasty analardy qarsy alý úrdiske ainala bastady. Keibir qalalarda bul ispen áielder ainalyssa, Qyzylordada bastamany er adam qolǵa alǵan.
«Men mundai trend bar ekenin estimedim. Meniń eriktilerim de, qoldaý kórsetetin top ta joq. Men – zaýytta jumys isteitin qarapaiym jumysshymyn. Bul isti kezdeisoq bastadym. Bir kúni dosymmen birge onyń áielin perzenthanadan qarsy alýǵa bardyq. Biz kóp týyspen keldik, qolymyzda gúlder men syilyqtar boldy, animatorlar da shaqyrttyq. Barlyǵy qýanyshty, sábidi taǵatsyzdana kútip turdy. Sol sátte bólimsheden kóz jasyna erik bergen áielderdiń shyǵyp kele jatqanyn kórdim. Olar saltanatty qarsy alýlardy kórmes úshin balalaryn qushaqtap, asyǵys ótip jatty. Sol kezde bul áielderdiń kúieýi joq ekenin, tipti týystary da kelmeitinin túsindim», – deidi Maǵjan Nalibaev.
Onyń aitýynsha, bul kórinis júregine qatty áser etken. Ol balasynan, ony dúniege ákelgen áielden bas tartýǵa qalaisha bolatynyn, sondai mańyzdy kúni sábidi qarsy almaýdy túsine almaǵan. Osy oilardan keiin TikTok jelisine video jazǵan:
«Qymbatty qyzylordalyq qyz-kelinshekter, jalǵyzbasty analar. Eger siz perzenthanadan shyǵar kezde janyńyzda eshkim bolmasa, kóńilińiz jabyrqap, ózińizdi jalǵyz sezinbeýińiz úshin men sizdi qarsy alýǵa daiynmyn».
Osydan keiin oǵan qońyraýlar men ótinishter túse bastaǵan: bireýlerge perzenthanaǵa jórgek kerek bolsa, endi bireýlerge – jańa týǵan sábige arnalǵan kiimder qajet bolǵan. Keibiri aldyn ala habarlasyp, shyǵý kúnin kelisip otyrǵan. Sóitip, elimizde jalǵyzbasty analardyń az emes ekeni belgili bolǵan.
«Áieldiń jalǵyzbasty ana atanýyna qandai sebep bolǵanyn bilmeimin. Biraq qalai bolǵanda da, er adam dúniege kelgen bala úshin de, júktilik pen bosanýdy bastan ótkergen áiel úshin de jaýapkershilik kóterýi tiis dep esepteimin. Jańa týǵan náreste eresekterge tolyqtai táýeldi: onyń qaýipsizdigi, densaýlyǵy, emotsiialyq damýy ata-anasynyń qanshalyqty senimdi tirek bola alýyna bailanysty. Sondai ákelerdiń júregi selt etpei me? Ol balanyń jáne anasynyń bolashaǵy qalai bolady? Olar nege muqtaj?» – deidi Maǵjan Nalibaev.
Qazirgi tańda Maǵjan birneshe áielge kómektesken. Oǵan beijai qaramaityn qyzylordalyqtar habarlasyp, óz úlesterin qosqysy keletinderin aitýda: telefon nómirlerin qaldyryp, mýzykalyq súiemeldeý, kólik, tipti bala kútimine kómektesýdi de usynǵan. Aldaǵy ýaqytta onyń kómekshileri paida bolyp, perzenthanadan jalǵyzbasty analardy qarsy alatyn úlken eriktiler toby qurylýy múmkin.
Maǵjannyń ózi áli úilenbegen, biraq bolashaq jarym mundai jaǵdaiǵa eshqashan tap bolmaidy dep senimdi. Óitkeni ol er adamnyń jaýapkershiligi – jetilgendik, adaldyq pen mahabbattyń kórinisi ekenin jaqsy túsinedi. Bul – balanyń bolashaǵyna, ananyń amandyǵyna jáne adamnyń óz damýyna qosylǵan úles.
