Astanadaǵy sotta prokýrorlar Perizat Qairattyń sý tasqynynan zardap shekken qazaqstandyqtarǵa kómek retinde jinalǵan aqshany qalai iemdengeni jónindegi tergeý nusqasyn jariia etti, dep habarlaidy Dalanews.kz.
"Tabiǵi apat saldarynan qoǵamda haos pen emotsiialar beleń alyp jatqan tusta adamdar aldaýǵa beiim bolatynyn túsine otyryp, Perizat Qairat pen Ǵaini Alashbaeva ózge adamdarmen aldyn ala sóz bailasa otyryp, qaiyrymdylyq kómek kórsetý syltaýymen halyqtyń senimin teris paidalanyp, aqshalai qarajatty alaiaqtyq jolmen jymqyrý týraly jańa qylmystyq nietke barǵan", – dedi prokýror Arman Kezeken.
Perizat Qairat osy syltaýmen 2,8 mlrd teńge qarajat jinaǵan. Tergeý nusqasyna sai, sonyń 1,9 mlrd teńgesin aiyptalýshylar jeke maqsatqa jumsaǵan, al 920 mln teńge ǵana shynymen zardap shekkenderge kómektesý úshin paidalanylǵan.
Prokýrordyń aitýynsha, qarajatty zańdastyrý úshin Perizat Qairat kelesi jospardy jasaǵan:
- Qordyń aqshalai qarajatyn qolma-qol aqshaǵa ainaldyra alatyn jeke kásipkerlerdi tartý;
- Qarajatty Qytaidan taýarlar, kiiz úiler, arnaiy kiim jetkizý jónindegi jalǵan mámileler túrinde jeke kásip shottaryna aýdarý;
- Osy qarajatqa múlik satyp alý;
- Múliktiń bir bóligin Alashbaevanyń jáne aty atalmaǵan týysynyń atyna rásimdeý.
Prokýrordyń sózinshe, bul josparyn iske asyrý úshin Qairat tanys kásipkerlerge júgingen, biraq olardy óz qylmystyq nietine tolyqtai qanyq qylmaǵan. Qolma-qol aqshaǵa ainaldyrǵany úshin jeke kásip ókilderi aýdarym somasynan 3–4,5% mólsherinde syiaqy alǵan. Qarajat salyq tóleý shegine ilinbeý úshin 20 myń AEK-ten (shamamen 73 mln teńge) aspaityn somalarǵa bólingen.
