Qazaqstannyń Oqý-aǵartý ministrligi pedagogterdi attestattaý júiesine qatysty Dalanews.kz redaktsiiasynyń saýalyna resmi jaýap berdi.
Testileý ishinara saqtalǵan
Ministrlik málimetinshe, pedagogterdiń biliktiligin baǵalaý testileýi tolyq joiylmaǵan. Jańa attestattaý qaǵidalaryna sáikes, testileýden endi tek pedagog mamandyǵyna alǵash ret jumysqa ornalasatyn úmitkerler, sondai-aq bilim berý uiymdarynyń basshylary, olardyń orynbasarlary men ádiskerler ótedi.
"Al burynnan jumys istep júrgen pedagogter úshin baǵalaý tásilderi ózgerip, testileý talaptary jeńildetilgen", - dedi vedomstvo.
Testileý týraly habarlamalar nege jiberildi?
Ministrlik óńirlerge testileýge qatysty habarlamalardyń joldanýyn attestattaý úderisiniń kezeń-kezeńimen júzege asyrylyp jatqanymen túsindirdi.
Atap aitqanda, 2026 jyldyń 16 sáýirinen bastap testileýdiń alǵashqy múmkindigin paidalanbaǵan pedagogterge qaita tapsyrýǵa jaǵdai jasalǵan.
Sondai-aq vedomstvo attestattaý rásimi ázirge qoldanystaǵy qaǵidalarǵa sáikes júrgizilip jatqanyn atap ótti.
Málimdeme men nusqaýlyq arasynda qaishylyq joq
Ministrlik ministrdiń málimdemesi men óńirlerge joldanǵan nusqaýlyqtar arasynda qaishylyq joq ekenin málimdedi.
"Ministrdiń málimdemesi – bul reformanyń negizgi baǵyttary men strategiialyq ustanymdaryn aiqyndaityn jalpy saiasattyq pozitsiia. Al óńirlerge joldanǵan nusqaýlyqtar sol ózgeristerdi is júzinde kezeń-kezeńimen júzege asyrý tetikterin naqtylaidy", – dep túsindirdi vedomstvo.
Iaǵni aiyrmashylyq mazmunda emes, tek aqparattyń berilý deńgeiinde – biri jalpy baǵytty kórsetse, ekinshisi naqty rásimder men merzimderdi qamtidy.
Júie kezeń-kezeńimen jańartylady
Ministrlik qazirgi kezeńdi ótpeli kezeń retinde baǵalap otyr.
"Osy ýaqytta qoldanystaǵy Qaǵidalar men jańa tásilder qatar qoldanylýy múmkin. Sondyqtan keibir máseleler boiynsha túsindirmeler kezeń-kezeńimen naqtylanyp otyrady", – delingen jaýapta.
