Memleket basshysy Qasym-Jomart Toqaev quqyq qorǵaý organdarynyń keńeitilgen alqa májilisinde sóz sóiledi, dep habarlaidy Dalanews.kz.
"Politsiia men basqa da qurylymdar bilik jáne qoǵam arasyn bailanystyratyn altyn kópir bolýǵa tiis. Ol úshin "Memleket pen azamat – birtutas" degen irgeli qaǵidatymyzǵa tolyq sai keletin halyqpen qarym-qatynastyń jańa mádenietin qalyptastyrý kerek. Bul baǵytta ilgerileý bar. Biraq qabyldanǵan sharalar áli tiimdiligin kórsetpedi, óitkeni birizdilik joq. Halyqpen tikelei jumys isteýge kedergi keltiretin basy artyq biýrokratiiadan arylý kerek", - dedi Toqaev.
Memleket basshysynyń pikirinshe, ýchaskelik inspektorlardyń áleýetin odan ári nyǵaitý qajet.
"Sebebi olar is júzinde memleket men qoǵam arasyndaǵy basty dáneker sanalady. Ásirese, bul aýyldyq jerde anyq baiqalady. Óitkeni jergilikti turǵyndar úshin ýchaskelik inspektor – qorǵaýshy, quqyqtyq keńesshi, tipti ádildik surap júginetin sońǵy instantsiia. Meniń oiymsha, aýyldaǵy ýchaskelik inspektorlarǵa shen bergen kezde jeńildik jasap, iaǵni bir jyldyq eńbek ótilin 1,5 jyl dep esepteý qajet. Aýyldaǵy ýchaskelik inspektorlardy baspanamen qamtyp, materialdyq-tehnikalyq bazasyn nyǵaitý kerek. Óńir ákimderi osy máselege muqiiat nazar aýdarǵany durys. Ýchaskelik politsiiany jańǵyrtýmen qatar, patrýldik beketter qyzmetiniń jumysyn qaita qaraý qajet", - dedi Prezident.
Sonymen qatar, Qasym-Jomart Toqaev patrýl qyzmetkerleri azamattarmen jumys barysynda ádep saqtap, kásibilik tanytqany jón ekenin málimdedi.
"Patrýl qyzmetkerleri azamattarmen jumys barysynda ádep saqtap, kásibilik tanytqany jón. Óz kezeginde azamattar da politsiianyń zańdy talabyna baǵynýǵa mindetti. Áitpese kóshede tártip bolmaidy", - dedi Toqaev.
