“Pákistanda 300 qazaq barmyz, bizdi alyp ketińizder” dep kómek suraǵan azamattar Qazaqstan úkimetinen kúder úzgen, dep habarlaidy Dalanews.kz.
Bul týraly kómek suraǵandardyń biri - Hamit Jorabai jazdy.
"Biz, Pákistannyń Karachi qalasynyń qazaqtary, 20 kúnnen beri úiimizde qamalyp otyrmyz. ómir súrý óte qiyn boldy. Qazaqstan úkimetinen eshqandai jaýap alǵan joqpyz. Balalarymyzdyń jaǵdaiy óte aýyr bolyp ketti. Sońǵy birneshe kúnde 30 adam elden shyǵaryldy. Biz de ózimizdi Pákistan politsiiasyna tapsyrýdy uiǵardyq. Bizdi deportatsiialasa jaqsy bolar edi. Sizge, Qazaqstannyń Syrtqy ister ministrligine jáne qurmetti elshige rahmet. Siz bizge kóp kómektestińiz", - deidi Jorabai.
Májilis depýtaty Erlan Sairov Pákistandaǵy qazaqtardyń taǵdyryna alańdaýly ekenin aityp, olarǵa shuǵyl kómek kórsetýge shaqyrdy.
"Pákistannyń Karachi qalasynan Hamit «Jorabai degen qazaq baýyrymyz habarlasty. Onyń aitýynsha, osydan 2 jyl buryn 40 januia, 300 qazaq Aýǵanstannan Pákistanǵa bosyp barǵan. Olarǵa Qazaqstannyń Pákistandaǵy elshisi kelip, jaǵdaidy kórip, kómektesýge ýáde bergen. 30 tamyz kúni Pákistan osy 300 qazaqty qaitadan Aýǵanstanǵa deportatsiialaityndaryn málimdegen", - dedi depýtat.
Sairov birden cyrtqy ister ministrligine habarlasqanyn málimdedi.
"Vedomstvo bul jaǵdai týraly biletinin, alaida kómektese almaityndaryn málimdedi. Aitýlarynsha, azamattardyń qolynda «ulty qazaq» degen anyqtama joq. Bul máseleni sheshý úshin qaitadan Aýǵanstanǵa baryp, qajet anyqtamany alý kerek eken. Ol elge barsa, jaǵdailary óte qiyn bolady. Sondyqtan men Úkimet basshysy Oljas Bektenovke, Syrtqy ister ministri Murat Nurtileýge úndeý jariialaimyn. Qan sý emes. Biz iisi qazaqty qutqarýymyz kerek. Qurmetti azamattar, 300 qazaqty kóshirýge jaǵdai jasaiyq. Eger múmkindigimiz bolmasa, BUU Bosqyndar isteri jónindegi Joǵarǵy komissary basqarmasynyna ótinish jasaý kerek. Olar 300 qazaqty bosqyn retinde moiyndaýlary kerek. Sol kezde atalǵan azamattardyń qaýipsizdigi sheshiledi. Qurmetti qaýym, qoldaýlaryńyzdy suraimyn!", - dep tolyqtyrdy ol.
