Tashkentte "Azattyqqa" suhbat bergen Atajanov opozısıalyq "Erk" ("Erik") partıasynyń qyzmetin qaıta jandandyratynyn málimdedi.
– Men sol úshin Ózbekstanǵa keldim. Maqsatym – prezıdent bolý, sheginerge jol joq, – dep málimdedi burynǵy ánshi.
Eske salaıyq, byltyr jeltoqsanda 42 jastaǵy Jahongır Atajanov sahnadan ketkenin, óıtkeni onyń «sharıǵat zańdaryna qaıshy» ekenin aıtqan.
Áleýmettik jeli qoldanýshylary burynǵy ánshiniń prezıdent saılaýyna qatysqysy keletini týraly málimdemesin túrlishe qabyldady. Ózbekstanda prezıdent saılaýy bıyl qazanda ótedi.
Ózbekstan zańdaryna sáıkes, prezıdent qyzmetine úmitkerdi saıası partıalar ǵana usyna alady.
Atajanovtyń Ózbekstanda opozısıalyq partıa qurýǵa talpynysynan túk shyqpady. Endi ol jańa partıa qurý oıynan bas tartyp, táýelsiz Ózbekstan tarıhyndaǵy alǵashqy opozısıalyq «Erk» partıasynyń qyzmetin jandandyrǵysy keletinin málimdedi.
Ol bıyl narýyzda Ystambýlda «Erk» partıasynyń negizin qalaýshy, tanymal ózbek aqyny Muhammad Salıhpen kezdesken.
Qýǵyndaǵy Muhammad Salıh birazdan beri Túrkıada turady. Ózbek bıliginiń qysymyna ushyraǵan ol Ózbekstannan 1993 jyly ketýge májbúr bolǵan.
