Qazaqstanda turǵyn úidi bólý úderisi jańa tsifrlyq modelge kóshti. Otbasy bank bul jumysty avtomattandyrý úshin «Turǵyn úimen qamtamasyz etý ortalyǵy» tsifrlyq platformasy men orken.otbasybank.kz portalyn iske qosty, dep habarlaidy dalanews.kz.
Jańa júieniń basty ereksheligi – azamattardyń derekterin tekserýden bastap, turǵyn úi alý talaptaryna sáikestigin anyqtaýǵa deiingi negizgi protsester adamnyń tikelei aralasýynsyz júzege asyrylady.
Platforma 15 memlekettik derekter bazasymen integratsiialanǵan. Júie ótinish berýshi týraly málimetterdi avtomatty túrde salystyryp, qaitalanatyn aqparatty anyqtaidy jáne azamattyń turǵyn úi bólý talaptaryna sáikestigin tekseredi.
Osylaisha árbir otbasy boiynsha qajetti málimetter jinaqtalǵan tsifrlyq karta qalyptasady. Buryn mamandardyń qatysýyn jáne birqatar qujatty tekserýdi qajet etken jumystar endi avtomatty rejimde oryndalady. Bul bir jaǵynan qaǵazbastylyqty qysqartsa, ekinshi jaǵynan turǵyn úi bólý kezinde adam faktorynyń yqpalyn barynsha azaitýǵa múmkindik beredi.
Tsifrlandyrý turǵyn úi kezeginde turǵan azamattarǵa da jańa múmkindikter ashty. 2026 jyldyń shildesinen bastap, olardyń jeke kabineti Otbasy bank mobildi qosymshasynda qoljetimdi boldy. Endi azamattar smartfon arqyly óz mártebesin, sanatyn, esepke qoiylǵan kúnin jáne óńirin teksere alady. Sondai-aq ETsQ arqyly derbes derekterdi jinaýǵa jáne óńdeýge kelisim berýge múmkindik bar.
Jyl sońyna deiin qosymshanyń fýnktsionaly taǵy keńeimek. Azamattar mobildi qosymsha arqyly turǵyn úige muqtaj retinde esepke turyp, turǵyn úidi bólýge qatysý úshin qajetti kelisimge qol qoia alady.
Bul ózgeris aýyldar men shalǵai eldi mekenderde turatyn azamattar úshin de mańyzdy. Buǵan deiin birqatar qyzmetti alý úshin kompiýter paidalaný nemese aýdandyq, oblystyq ortalyqqa barý qajet bolsa, endi negizgi rásimderdi smartfon arqyly oryndaýǵa múmkindik jasalady.
Memlekettik qoldaý sharalary aiasyndaǵy turǵyn úi baǵdarlamalaryn iske asyrý úshin jergilikti atqarýshy organdar Otbasy bankke 32188 turǵyn úi nysanyn tapsyrdy.
Onyń 20321-i «JAO-dan jalǵa beriletin turǵyn úi» baǵytyna tiesili. Búginge deiin sonyń 15511-i bólindi. Al «Nesielik turǵyn úi» baǵyty boiynsha bankke 11867 baspana berilip, 6922 qaryz rásimdeldi.
Bul kórsetkishter jańa modeldiń turǵyn úi bólý qarqynyna da áser etkenin ańǵartady. Buǵan deiin ákimdikter jylyna orta eseppen 7 myńǵa jýyq páter bóletin. Bul jumysqa elimizde shamamen 700 qyzmetker tartylǵan.
Qazir bul mańyzdy mindetti Otbasy banktiń nebary 20 mamany atqarady. Al avtomattandyrýdyń nátijesinde turǵyn úidi bólý qarqyny burynǵydan úsh ese artqan.
Osylaisha tsifrlyq júie tek qyzmetkerler sanyn ońtailandyrý quraly emes, turǵyn úi bólý tetigin jedeldetýdiń negizgi faktorlarynyń birine ainalyp otyr.
Turǵyn úige muqtaj azamattardy baspanamen qamtamasyz etý jumysy aldaǵy jyldary da jalǵasady. 2021 jyldan beri turǵyn úi kezeginde turǵan 143400 qazaqstandyq óz baspanasyna qol jetkizdi.
Endigi meje budan da aýqymdy. 2033 jylǵa deiin Otbasy bank baǵdarlamalary arqyly taǵy 292 myń adamdy turǵyn úimen qamtamasyz etý josparlanyp otyr.
Turǵyn úi bólý júiesin tsifrlandyrý osy mindetti júzege asyrýdyń negizgi tetikteriniń birine ainalmaq. Avtomattandyrý, memlekettik bazalarmen integratsiia jáne mobildi servisterdi damytý turǵyn úige muqtaj azamattar úshin qyzmetti qoljetimdi etip qana qoimai, baspana bólýdiń ashyqtyǵy men jyldamdyǵyn arttyrýǵa baǵyttalǵan.
