Órt sóndirýshiler bul sharany el Táýelsizdiginiń 30 jyldyǵyna arnady.
“Vertikaldy synaq” dep atalatyn osynaý syn óz salasyn jetik meńgergen mamandardyń sheberligin shyńdaýǵa baǵyttalǵan.
Shart boiynsha órt sóndirýshiler biiktigi 18 qabatty quraityn ǵimaratqa jyldam kóterilýi tiis.
“Osy arqyly bizdiń kásiptiń qanshalyqty aýyr, qiyn mamandyq ekenin kórsetkimiz keledi. Órt sóndirýshilerdiń áleýmettik máselesine el nazaryn aýdartýdy maqsat tuttyq. Sonymen qatar osy bastama arqyly salaýatty ómir saltyn nasihattaǵymyz keldi”, – deidi sala mamandary.
Osy maqsatta qaladaǵy “Jas órken” yqsham aýdanynda ornalasqan turǵyn-úi ýaqytsha sport-synaq alańyna ainaldy.
18 qabattan turatyn turǵyn-úidiń baspaldaǵymen bir demmen júgirip ótip, óz álýetin baǵalaýǵa qaladaǵy 5 birdei órt sóndirý bóliminiń órt sóndirýshi ári qutqarýshy mamandary qatysty.
Sharaǵa uiytqy bolǵan azamattardyń pikirinshe, órt sóndirýshiniń jabdyǵyn tolyq kiip, ottegi apparatymen tynys alyp, joǵaryǵa jyldam jetken maman úzdik atanady.
Órt sóndirýshiniń arnaiy kiimin arqalap júrýdiń ózi ońai emes. Kiimnen bólek buǵan kaskany qosyńyz, belbeýi bar, ottegi apparaty bar, maskasy jáne bar. Shamalap alǵanda bulardyń salmaǵy 20 keliden asyp ketedi.
“Mundai júkpen joǵaryǵa kóterilý kez-kelgenniń qolynan kelmeidi. Óte aýyr synaq. Birinshi kezekte tózimdilik qajet, durys tynystai bilý de mańyzdy, kúshińdi ornymen jumsaǵan jón. Solai bolsa tura adam bop jaratylǵasyn sharshamai tura almaisyń. 10-shy qabatqa kóterilgende qaljyrai bastaisyń, aiaǵyń ózińe baǵynýdan qalady. Tek 13 qabatqa jete bere ekinshi tynysyń ashylady”, – deidi órt sóndirýshiler.
Jarys nátijesi boiynsha birinshi oryndy Petropavldyń №5 órt sóndirý bóliminiń qutqarýshysy Baqyt Merekenuly ielendi. Ol 18-shi qabatqa 1 minýt 42 sekýndta kóterildi. Al komandalyq alamanda № 1 órt sóndirý bólimi úzdik dep tanyldy.
