Otandyq taýar óndirýshilerdi qoldaý maqsatynda birqatar jańa sharalar qabyldandy, bul týraly Qarjy vitse-ministri Dáýren Keńbeiil baspasóz konferentsiiasynda málimdedi, dep habarlaidy Dalanews.kz.
Onyń aitýynsha, qazaqstandyq óndirýshiler úshin mindetti avans mólsheri 50% deńgeiinde belgilenip, barlyq túrdegi qamtamasyz etýden bosatý tetigi qarastyrylǵan. Sonymen qatar taýardy jetkizý merzimi 60 kúnge deiin uzartylyp, jetkizilgen ónim úshin tólem jasaý ýaqyty 10 kúnge deiin qysqartylǵan. Budan bólek, ofteik kelisimsharttar jasaý múmkindigi engizilgen.
Qabyldanǵan sharalar nátijesinde otandyq kásiporyndarmen jasalatyn sharttar kólemi aitarlyqtai artqan.
«2025 jyldyń qorytyndysy boiynsha tapsyrys berýshiler otandyq taýar óndirýshilermen 456 mlrd teńgege kelisimshart jasady. Bul 2024 jylmen salystyrǵanda 23%-ǵa kóp», – dedi vitse-ministr.
Sondai-aq memlekettik satyp alýlarda EPC jáne EPC+F sharttary engizilgen. EPC sharty boiynsha bir merdiger jobalaýdan bastap qurylys jumystaryn júrgizip, nysandy paidalanýǵa berýge deiin tolyq jaýapty bolady. Al EPC+F tetigi merdigerdiń jobany óz qarajaty esebinen júzege asyrýyn kózdeidi.
Qarjy vitse-ministriniń aitýynsha, bul mehanizmder burynǵy zańnamada bolmaǵan. Qazir olardy qoldanýǵa múmkindik beretin zańǵa táýeldi aktiler kúshine engen, al elektrondy portal kelisimsharttardy jasasýǵa daiyn.
Bilik bul ózgerister otandyq óndirýshilerdiń qarjylyq júktemesin azaityp, óndiristik áleýetin arttyrýǵa múmkindik beredi dep otyr.
