«Otandyq óndiris» respýblikalyq media jobasy Túrkistan oblysy men Shymkent qalasynda jalǵasyn tapty. Kezekti baspasóz týry aiasynda BAQ ókilderi, blogerler men qoǵamdyq pikir kóshbasshylary óńirdiń ónerkásiptik kásiporyndaryna bardy, – dep habarlaidy Dalanews.kz.
Jýrnalister aldymen Kentaý qalasynda ornalasqan transformator zaýytynyń jumysymen tanysty. Kásiporynda negizinen zamanaýi qondyrǵylar paidalanylyp, jylyna 12 myń dana ónim óndiriledi.
– Bizdiń zaýytta qazir shikizattyń 15 paiyzy ǵana syrttan ákelinedi. Zaýyt jobalaý institýttarymen tyǵyz jumys isteidi. Qazaqstan tarihynda tuńǵysh ret «Astana EXPO-2017» úshin arnaiy salmaǵy 125 tonna, kerneýi 110 kV, qýaty 80000 kVA elektrli mashinany shyǵardyq. Jumys sapasyn arttyrý úshin Japoniianyń kaidzen júiesin qoldanýdamyz, – dep atap ótti zaýyttyń Basqarma Tóraǵasy Baýyrjan Qudaibergenov.
Óndiris ornynda 1 100 adam jumys isteidi. Ortasha jalaqy mólsheri – 308 000 teńge.
Transformator zaýytynda bir ýaqytta 6 adamnyń jumysyn atqara alatyn japondyq «Yaskawa Motoman» dánekerleýshi-roboty iske qosylǵan. Qazirgi tańda zaýyt qýattylyǵy 80 000 kVa deiingi maily jáne qurǵaq transformatorlardy, qosalqy stantsiialardy, tómen jáne joǵary voltty uiashyqtardy, vakýýmdyq ajyratqyshtardy shyǵarady.
Sonymen qatar, baspasóz týryna qatysýshylar Shymkent qalasynda ornalasqan «Asia Trafo» transformatorlyq zaýytynyń jumysymen de tanysty.
«Asia Trafo» – elimizdegi transformatorlyq jabdyqtar shyǵaratyn eń iri zaýyt. Búginde óndiris orny 350 adamdy jumyspen qamtamasyz etýde. Zaýyt ónimderi tek ishki naryqta ǵana emes, sonymen qatar shetelde de suranysqa ie. «Asia Trafo» jyl saiyn TMD naryǵyna kerneýi 110 kV jáne odan joǵary transformatorlyq jabdyqtardyń eksporttyq jetkizilimderiniń sanyn kóbeitýde.
Jýrnalisterge alǵash ret biregei jańa ónim – qýattylyǵy 250 000 kVA jáne kerneýi 500 kVt úsh fazaly avtotransformator kórsetildi. Qazaqstan tarihynda alǵash ret jasalǵan avtotransformatordyń jalpy uzyndyǵy 13 metrden asady, al biiktigi 10 metr. Bul Qazaqstanda bar avtotransformatorlardyń eń iri túrleriniń biri. Ónimniń jalpy salmaǵy 295 tonna.
Esterińizge sala keteiik, aǵymdaǵy jyldyń qyrkúiek aiynyń ortasynda QR Ónerkásip jáne qurylys ministrligi oblystar men qalalardyń ákimdikterimen birlesip «Otandyq óndiris» media jobasynyń bastalǵanyn habarlaǵan bolatyn. Atalǵan jobanyń negizgi maqsaty otandyq ónerkásipti tanymal etý, kásiporyndardyń oń tájiribelerin kórsetý jáne elishilik qundylyq ideialaryn nasihattaýǵa baǵyttalǵan. Joba aiasyndaǵy alǵashqy baspasóz týry Almaty qalasynda ótti.
