Óskemenniń joly keńeie túspek
Jaqynda oblys ákimi Danial Ahmetov jumys kúnin Óskemendegi jol-jóndeý jumystarynyń barysyn tekserýden bastady. Qaita qurý isi júrip jatqan qaladaǵy barlyq kóshelerdi aralady. Aita ketý kerek, bul jobalar aldaǵy 15 jylda oblys ortalyǵyndaǵy kólik keptelisin ońtaily sheshýi tiis. Búginde Sátpaev dańǵylynda jumys barysy qarqyndy. Merdigerler 700 mln teńgeni igerip úlgergen. Jibek matalar kombinaty shaǵyn aýdanynyń basty jolyn 6 jolaqty etý josparlanǵan edi, alaida aimaq basshysy jobalyq-smetalyq qujatqa tolyqtyrý engizýdi tapsyrdy.
– Ortasyn bólip turǵan jolaqty alyp tastaý kerek. Osylaisha joldy eki esege úlkeite alamyz. JSQ qysqy maýsymda túzetýler engizińizder. Al qazir qurylys-qurastyrý jumystaryn toqtatpai, jalǵastyrý qajet. Kelesi jyly 1 mlrd. 800 mln. teńge bólemiz. Aiyryq jolaq máselesin qarastyrýdy jiti tapsyramyn, – dedi ShQO ákimi Danial Ahmetov.
– Qaita qurýdaǵy basty maqsat, sizder Astana kóshesinde istemek bolǵan asfalt jabyndysyn aýystyrý emes, júrý jolaǵyn keńeitý, – dedi Danial Ahmetov merdigerlerge qarata. – Taǵy da Astana men Protozanov kósheleriniń jolaǵyn barynsha keńeitýdi tapsyramyn. Olardyń qatary tórteý bolýy tiis.
Óskemen ákiminiń orynbasaryna keler jyly baiqaýǵa elimizdegi basqa da jobalaýshy uiymdaryn shaqyrý tapsyryldy. Sebebi, jergilikti kompaniialar merzimin keshiktirip qana qoimai, tekserý kezinde oblys ákimi anyqtaǵandai, jobada qatelikter jibergen.
Kelesi nysanda isine jaýapsyzdyq tanytqan «ElitEnergoStroi» kompaniiasy ózgelerden erekshelendi. Jóndeý jumystaryna nebári 4 tehnika jumyldyrylǵan. Seriktestik Lopatino aralynan Ertis ózeninen ótetin kópirden Ahmer aýylyna deiingi aýmaqtaǵy mindetti moinyna alǵan edi. Tyńdyrylǵan tynymdy is bolmaǵandyqtan, oblys ákimi qarajat aýrýhananyń qurylysyna aýdarýdy tapsyrdy. Jobanyń jalpy quny 1 mlrd 128 mln teńge. Biylǵa bólingen ári tolyq igerilmegen soma 700 millionnan asa teńgeni quraidy.
ShQO ákiminiń baspasóz qyzmeti
https://dalanews.kz/30258
