SHQO ákimi búgin tún ortasynda Óskemendi qardan tazartý boıynsha keńes ótkizdi. Oǵan qalalyq komýnaldyq qyzmettermen qatar jol jóndeýmen aınalysatyn aımaqtyq kásiporyndardyń basshylary da qatysty.
Keńestiń qorytyndysy boıynsha óńir ákimi Danıal Ahmetov oblystyq mańyzdaǵy jol kompanıalarynyń arnaıy tehnıkalaryn Óskemendi qardan tazartý úshin tartý týraly ókimge qol qoıdy.
Jalpy sany 40 birlikti quraıtyn avtogreıderler, búldozerler, traktorlar, qar tıep, tasymaldaıtyn tehnıkalar oblys ortalyǵynyń shaǵynaýdandary boıynsha bólindi. SHQO ishki ister departamentine jol tehnıkasynyń kedergisiz jumys isteýin qadaǵalaý tapsyryldy. Qosymsha jumyldyrylǵan kásiporyndardyń shyǵyndary oblystyq búdjetten ótelmek.
Óńir basshysy Danıal Ahmetov Óskemendi qardan tazalaý boıynsha komýnaldyq mekemelerdiń jumystaryn ózi úılestirip, qatań baqylaýda ustaýda.
"QmD" aqparat
