Maqtaral aýdanynda «Órleý» jobasynyń arqasynda kásibin ashyp, áleýmettik jaǵdaıyn túzep jatqan otbasylar kóp. Bıyldyń ózinde 3046 otbasyndaǵy 18909 adam dál osy jobanyń jemisin kórip otyr. Bul týraly Maqtaral aýdany ákiminiń baspasóz qyzmeti habarlady.

«Órleý» jobasynyń arqasynda qarjy alyp, saýda dúkenin ashqan Igamkýlova Gýlsınaı búginde otbasyn asyrap, bala-shaǵasyn baǵyp otyr. Jobanyń arqasynda 472 myń teńge alǵan ol Elbasymyzdyń saıasatyna dán rıza. Sol sıaqty Kúzaıdarov Asylbek 567 myń teńge kólemindegi qarjylaı kómekti maqsatty túrde jumsap, aǵash óńdep, jıhaz jasaý sehyn ashqan.

Ońtústik Qazaqstan oblysy boıynsha «Órleý» jobasyna qatysqandardyń 14,9 paıyzy, qarjylaı kómek alǵandardyń 22,5 paıyzy maqtaraldyqtar eken. Aýdan boıynsha jobadan qarjylaı kómek alǵandardyń 70 paıyzy mal sharýashylyǵymen aınalyssa, qalǵandary qus sharýashylyǵy, saýda-sattyq, óndiris t.b. kásippen aınalysýda. Sonyń arqasynda jobaǵa qatysýshylardyń tabysy 3,4 esege ósken.

Aıta keteıik, osy jyly baǵdarlama arqyly maqtaraldyqtar jalpy somasy 1,4 mıllıard teńge kóleminde qarjylaı kómek alǵan.