EO elderi 2022 jyly energetika salasynda Máskeýge táýeldiligin úshten eki esedei azaitpaqshy. Syrtqy energetikalyq ózara árekettestikti keńeiter qujatty Eýrokomissiia mamyrdyń aiaǵynda qabyldaýy múmkin. Bul jóninde EO qujatynyń jobasyna silteme jasap Bloomberg habarlady.
Qujatta Nigeriia, Senegal jáne Angola tárizdi Afrika elderiniń suiyltylǵan gaz EO-ǵa jetkizýdi kózdeidi.
Eýroodaq josparynda buǵa qosa 2022 jyly AQSh-tan qosymsha 15 milliard tekshe metr suiyltylǵan gaz tasý jáne 2030 jylǵa deiin onyń kólemin jyl saiyn 50 milliard tekshe metrge deiin jetkizý qarastyrylǵan.
Sonymen qatar, EO Ázirbaijannan jetkiziletin gazdy jylyna 20 milliard tekshe metrge deiin arttyrmaq.
Buǵan deiin Bloomberg agenttigi Eýropa Odaǵy bilik oryndarynyń jyl aiaǵyna qarai Resei munaiyna embargo jariialaýǵa ázirlenip jatqanyn, al oǵan deiin birtindep importqa shekteý engizý nieti baryn habarlaǵan.
Máskeýge salynatyn jańa shekteýlerdi EO elderi elshileri eń taiaý kúnderi talqylaýdy josparlap otyr.
Reseide biýdjet kirisiniń teń jartysyna derligin jáne eksporttan túsetin tabystyń jartysynan astamyn munai-gaz sektory qamtamasyz etip otyr. Gazdyń 70 paiyzyn ári munai men munai ónimderiniń 60 paiyzyn Resei naq osy Eýropaǵa satyp paida tabady.
Kremldiń Ýkrainadaǵy soǵysty qarjylandyrý múmkindigin shekteý úshin Eýroodaq elderiniń kóbi Reseiden alatyn energiia tasymaldaýshy taýarlaryn azaitýdy kózdeitin sharalardy qabyldap jatyr. Bulai isteýden tek Vengriia ǵana úzildi-kesildi bas tartyp otyr.
