Hosh, saryla kútken adamymyz ne aitar eken dep bárimiz sonyń aýzyna qaradyq. Biraq Aýyl sharýashylyǵy ministrligi Strategiialyq josparlaý jáne analiz departamentiniń agrobiznes basqarmasynyń basshysy Azamat Qurmanov ókinishke qarai, tushymdy pikir aita almady. Asyǵyp kelip, aptyǵyn basa almai otyr ma desek, oiyn qazaqsha jetkizýge qinalyp, ejiktep, ábden qara terge tústi. «Ájeptáýir án edi, pushyq aityp qor qyldynyń» keri boldy, qysqasy.
Bárinen de alystan at aryltyp kelgen qarapaiym sharýalardan uiat boldy. Osy ýaqytqa deiin qaitsem qoramdy malǵa toltyryp, aýzymdy aqqa jarytam dep otyrǵan aýyldaǵy aǵaiynǵa kooperativ qurýdyń jai-japsaryn eshkim jarytyp túsindirip bere almaǵan-dy. «Aýylsharýashylyq kooperatsiiasy týraly» zańnyń kúshine engenine úsh aidai ýaqyt boldy, biraq áli kúnge deiin ol týraly qarapaiym aýyl turǵyndary túgil, jergilikti jerdegi aýyl sharýashylyǵy mamandarynyń ózderiniń habary az kórinedi. Mysaly, Aqtóbe oblystyq Aýyl sharýashylyǵy basqarmasynyń bastyǵy Qarjaýbai Ybyraiymulynyń aitýynsha, kooperatsiia týraly zań qabyldanǵanmen, ol zańdy iske asyrý týraly erejeler, jalpy aqparattyq nusqaýlyqtar joq. Budan keiin jetkilikti deńgeide túsindirý jumystarynyń júrmegeni aitpasa da túsinikti.
Sonda deimiz-aý, Aýyl jurty bilmese, mamandardyń habary az bolsa, ministrlik jarytyp túsindirip bere almasa bul zań kim úshin qabyldanyp otyr?! Maqsatymyz sanda bar, sanatta joq kóp zańnyń qataryn tolyqtyrý ma, álde rasymen turalap qalǵan aýyl sharýashylyǵyn damytý ma?
Sonymen, ókinishke orai, shalǵaida jatqan sharýalardyń salaǵa jaýapty ministrdiń ózi kelmese de, ókili keledi ǵoi, júzbe-júz kezdesip, surap qalsaq degen úmiti aqtalmady. Aýyldyń qamyn kúitteidi dep sengen bildei bir ministrlik mamanynyń pushaiman haline qarap, aidaladaǵy biz uiattan kirerge tesik tappai otyrdyq.
Bir bul ǵana emes, jalpy aýyl sharýashylyǵyn damytýǵa memlekettik biýdjetten milliondaǵan qarjy bólinip, osy ýaqytqa deiin qanshama baǵdarlama qabyldandy. Nátijesi qane sonyń?! Nege biz áli kúnge deiin Pákistannyń kartobyn, Ózbekstan men Qyrǵyzstannyń jemis-jidegin, Resei men Belarýssiianyń etin jep, sútin ishýge májbúr bolyp otyrmyz?! Osyny qarapaiym, túsinikti tilde túsindirip bere alatyn jibi túzý adam bolmaǵany ma, bildei bir ministrlikte?! Ári-beriden soń dál sol jiynǵa ministrdiń ózi keletindei jóni bar edi ǵoi.
Jalpy, kooperatsiia qurý jobasy ishki naryqty aýylsharýshylyq taýarlarymen qamtamasyz etý jáne aýylsharýashylyq ónimderiniń eksporttyq baǵytyn arttyrý maqsatynan týyndaǵan, álemniń damyǵan elderinde atam zamannan bar baǵyty igi, durys bastama ekenin túsinip otyrmyz. Biraq nege osy joba durys uiymdastyrylmaidy? Nege bizde osy «Istedik degennen góri, isteiin dep jatyrmyz» degen sóz kóp?! Sózden iske kóshetin kún qashan týady? Suraq kóp, mardymdy jaýap joq, biraq…
Jandos AIMAN
Derekkózi: ult.kz
