حوش, سارىلا كٷتكەن ادامىمىز نە ايتار ەكەن دەپ بەرٸمٸز سونىڭ اۋزىنا قارادىق. بٸراق اۋىل شارۋاشىلىعى مينيسترلٸگٸ ستراتەگييالىق جوسپارلاۋ جەنە اناليز دەپارتامەنتٸنٸڭ اگروبيزنەس باسقارماسىنىڭ باسشىسى ازامات قۇرمانوۆ ٶكٸنٸشكە قاراي, تۇششىمدى پٸكٸر ايتا المادى. اسىعىپ كەلٸپ, اپتىعىن باسا الماي وتىر ما دەسەك, ويىن قازاقشا جەتكٸزۋگە قينالىپ, ەجٸكتەپ, ەبدەن قارا تەرگە تٷستٸ. «ەجەپتەۋٸر ەن ەدٸ, پۇشىق ايتىپ قور قىلدىنىڭ» كەرٸ بولدى, قىسقاسى.
بەرٸنەن دە الىستان ات ارىلتىپ كەلگەن قاراپايىم شارۋالاردان ۇيات بولدى. وسى ۋاقىتقا دەيٸن قايتسەم قورامدى مالعا تولتىرىپ, اۋزىمدى اققا جارىتام دەپ وتىرعان اۋىلداعى اعايىنعا كووپەراتيۆ قۇرۋدىڭ جاي-جاپسارىن ەشكٸم جارىتىپ تٷسٸندٸرٸپ بەرە الماعان-دى. «اۋىلشارۋاشىلىق كووپەراتسيياسى تۋرالى» زاڭنىڭ كٷشٸنە ەنگەنٸنە ٷش ايداي ۋاقىت بولدى, بٸراق ەلٸ كٷنگە دەيٸن ول تۋرالى قاراپايىم اۋىل تۇرعىندارى تٷگٸل, جەرگٸلٸكتٸ جەردەگٸ اۋىل شارۋاشىلىعى ماماندارىنىڭ ٶزدەرٸنٸڭ حابارى از كٶرٸنەدٸ. مىسالى, اقتٶبە وبلىستىق اۋىل شارۋاشىلىعى باسقارماسىنىڭ باستىعى قارجاۋباي ىبىرايىمۇلىنىڭ ايتۋىنشا, كووپەراتسييا تۋرالى زاڭ قابىلدانعانمەن, ول زاڭدى ٸسكە اسىرۋ تۋرالى ەرەجەلەر, جالپى اقپاراتتىق نۇسقاۋلىقتار جوق. بۇدان كەيٸن جەتكٸلٸكتٸ دەڭگەيدە تٷسٸندٸرۋ جۇمىستارىنىڭ جٷرمەگەنٸ ايتپاسا دا تٷسٸنٸكتٸ.
سوندا دەيمٸز-اۋ, اۋىل جۇرتى بٸلمەسە, مامانداردىڭ حابارى از بولسا, مينيسترلٸك جارىتىپ تٷسٸندٸرٸپ بەرە الماسا بۇل زاڭ كٸم ٷشٸن قابىلدانىپ وتىر?! ماقساتىمىز ساندا بار, ساناتتا جوق كٶپ زاڭنىڭ قاتارىن تولىقتىرۋ ما, ەلدە راسىمەن تۇرالاپ قالعان اۋىل شارۋاشىلىعىن دامىتۋ ما?
سونىمەن, ٶكٸنٸشكە وراي, شالعايدا جاتقان شارۋالاردىڭ سالاعا جاۋاپتى مينيستردٸڭ ٶزٸ كەلمەسە دە, ٶكٸلٸ كەلەدٸ عوي, جٷزبە-جٷز كەزدەسٸپ, سۇراپ قالساق دەگەن ٷمٸتٸ اقتالمادى. اۋىلدىڭ قامىن كٷيتتەيدٸ دەپ سەنگەن بٸلدەي بٸر مينيسترلٸك مامانىنىڭ پۇشايمان حالٸنە قاراپ, ايدالاداعى بٸز ۇياتتان كٸرەرگە تەسٸك تاپپاي وتىردىق.
بٸر بۇل عانا ەمەس, جالپى اۋىل شارۋاشىلىعىن دامىتۋعا مەملەكەتتٸك بيۋدجەتتەن ميلليونداعان قارجى بٶلٸنٸپ, وسى ۋاقىتقا دەيٸن قانشاما باعدارلاما قابىلداندى. نەتيجەسٸ قانە سونىڭ?! نەگە بٸز ەلٸ كٷنگە دەيٸن پەكٸستاننىڭ كارتوبىن, ٶزبەكستان مەن قىرعىزستاننىڭ جەمٸس-جيدەگٸن, رەسەي مەن بەلارۋسسييانىڭ ەتٸن جەپ, سٷتٸن ٸشۋگە مەجبٷر بولىپ وتىرمىز?! وسىنى قاراپايىم, تٷسٸنٸكتٸ تٸلدە تٷسٸندٸرٸپ بەرە الاتىن جٸبٸ تٷزۋ ادام بولماعانى ما, بٸلدەي بٸر مينيسترلٸكتە?! ەرٸ-بەرٸدەن سوڭ دەل سول جيىنعا مينيستردٸڭ ٶزٸ كەلەتٸندەي جٶنٸ بار ەدٸ عوي.
جالپى, كووپەراتسييا قۇرۋ جوباسى ٸشكٸ نارىقتى اۋىلشارۋشىلىق تاۋارلارىمەن قامتاماسىز ەتۋ جەنە اۋىلشارۋاشىلىق ٶنٸمدەرٸنٸڭ ەكسپورتتىق باعىتىن ارتتىرۋ ماقساتىنان تۋىنداعان, ەلەمنٸڭ دامىعان ەلدەرٸندە اتام زاماننان بار باعىتى يگٸ, دۇرىس باستاما ەكەنٸن تٷسٸنٸپ وتىرمىز. بٸراق نەگە وسى جوبا دۇرىس ۇيىمداستىرىلمايدى? نەگە بٸزدە وسى «ٸستەدٸك دەگەننەن گٶرٸ, ٸستەيٸن دەپ جاتىرمىز» دەگەن سٶز كٶپ?! سٶزدەن ٸسكە كٶشەتٸن كٷن قاشان تۋادى? سۇراق كٶپ, ماردىمدى جاۋاپ جوق, بٸراق…
جاندوس ايمان
دەرەككٶزٸ: ult.kz
