Oral qalasynda jergilikti azamattyq belsendige áleýmettik máselelerdi kóterýdi kózdegen beıbit pıket ótkizýge ruqsat berilmedi, dep habarlaıdy Dalanews.kz.

Qala ákiminiń orynbasary Aslan Tapıshevtiń jaýabyna sáıkes, 9 qazan kúni Abaı alańynda stýdenttik uıym uıymdastyrǵan «Jastar festıvali» ótetindikten, pıketke ruqsat berilmegen. Ol turǵyndy kelisilmegen aksıaǵa shyqqan jaǵdaıda ákimshilik jaýapkershilikke tartylatynyn da eskertken.

Belsendi Bekbolat Ótebaev pıketti 9 qazanda ótkizýdi josparlap, 22 qyrkúıekte ákimdikke habarlama jibergen. Alaıda 24 qyrkúıekte resmı túrde bas tartý jaýaby kelgen.

"Qazaqstan bıligi halyqpen kelisimge kelýdi qalamaıdy. Zeınet jasyn tómendetý, komýnaldyq qyzmetter, azyq-túlik pen dári-dármek baǵasynyń ósýin toqtatý sıaqty zańdy talaptarǵa tyıym salyp otyr", – dedi Ótebaev.

Quqyq qorǵaýshylardyń syny

Qazaqstandyq quqyq qorǵaýshylar «Beıbit jınalystardy uıymdastyrý jáne ótkizý tártibi týraly» zańdy talaı márte synǵa alǵan. Olardyń aıtýynsha, bılik beıbit aksıalarǵa ruqsat bermegen jaǵdaıda, balama oryn nemese ýaqyt usynbaıdy. Bul tipti jalǵyz adamdyq pıketterge de qatysty.