Oral qalasynyń áleýmettik baǵdarlamalar bóliminiń basshysyna qatysty sotqa deiingi tergeý aiaqtaldy, dep habarlaidy Dalanews.kz.
Batys Qazaqstan oblysy boiynsha Sybailas jemqorlyqqa qarsy is-qimyl agenttigi «Oral qalasynyń jumyspen qamtý jáne áleýmettik baǵdarlamalar bóliminiń ómirlik qiyn jaǵdaiǵa qalǵan adamdardy qaita áleýmettendirýge arnalǵan ortalyǵy» KMM-niń direktoryna qatysty sotqa deiingi tergeýdiń aiaqtalǵanyn jetkizdi.
“Direktor elektr jabdyqtaryn aǵymdaǵy jóndeý jumystary boiynsha jalǵan aktilerge qol qoiyp, eńbek qyzmetin is júzinde oryndamaǵan adamdarǵa jalaqy esepteý arqyly 2024 jyldyń aqpan aiynan jeltoqsan aiyna deiin 11,5 million teńge biýdjet qarajatyn jymqyrdy dep aiyptaldy”, — delingen habarlamada.
Sybailas jemqorlyqqa qarsy agenttik ýákiletti memlekettik organdardyń qyzmetkerleri tarapynan zańsyz is-áreketterdiń aldyn alý boiynsha turaqty negizde profilaktikalyq jáne jedel is-sharalar júrgizedi.
“Aiyptalýshy sotqa tartyldy. Qylmystyq-protsestik kodekstiń 201-baby negizinde ózge aqparat jariia etilmeidi”, — dep tolyqtyrdy Antikor.
Konstitýtsiianyń 77-babynyń 3-tarmaǵy men Qylmystyq-protsestik kodekstiń 19-babynyń 1-bóligine sáikes, aiyptalýshynyń kinási tek sottyń zańdy kúshine engen úkimimen anyqtalady.
