Almaty oblysynyń prokýrory Berik Adamov Sherzat Bolattyń otbasynyń úiinen shyqqan órtke qatysty jańa málimetter aitty, - dep habarlaidy Dalanews.kz.
"Onyń otbasy turǵan úidegi órttiń sebebin belsendi túrde zerttep jatyrmyz. Órt bolǵan jerde mańyzdy dálelder jinalyp, alty júzden asa adam suraldy. Oqiǵa qalai bolǵanyn anyqtaý úshin birneshe saraptama taǵaiyndaldy.
Mamandar órttiń úidiń syrtynan bastalǵanyn, oqys jaǵdai bolmaǵanyn jáne syrtqy ot kózin qoldanylǵanyn alǵashqy qorytyndy retinde shyǵardy. Oqiǵa ornynan tabylǵan kanistr men rezeńke qolǵaptarǵa zertteýler júrgizilip jatyr. Shyǵyn kólemi anyqtalyp jatyr", - dedi Berik Adamov.
Aita keteiik, 12 qazanǵa qaraǵan túni Talǵar tragediiasynda qaza tapqan Sherzat Bolattyń úii órtenip ketti.
Qazirgi tańda Talǵar aýdanynda úidi órteý qylmysy boiynsha barlyq aiǵaq alynyp, qajetti saraptamalar júrgizilýde.
Ishki ister ministriniń birinshi orynbasary Baýyrjan Álenov pen Almaty oblysynyń prokýrory Berik Adamov Talǵar aýdanyndaǵy úidi órteý faktisi boiynsha tergeý barysy týraly habarlady.
Álenovtyń aitýynsha, qylmys jasalǵan sátten bastap, iaǵni 4 qazannan beri Talǵar aýdanynda ministrdiń birinshi orynbasary bastaǵan IIM ortalyq apparaty qyzmetkerlerinen quralǵan jedel-tergeý toby jumys istep jatyr.
"Jedel-tergeý toby qurylyp, qylmys jasalǵan jerde muqiiat tekserý jumystaryn júrgizýde. Beinebaqylaý kameralarynan jazbalar qaralýda. Aýlalar men esepte turǵan tulǵalar tekserilýde. Otbasynyń turǵylyqty jerin politsiia qyzmetkerleri patrýldeýde", - dedi ol.
Oqiǵa oryn alǵan kezde órt bolǵan úide eshkim turyp jatqan joq edi. Januia qazirgi kezde basqa mekenjaida turyp jatyr.
Qylmyskerler ustalyp, mindetti túrde jaýapqa tartylady. Sonymen qatar jalǵan aqparat taratpaýǵa shaqyramyn, – dedi Ishki ister ministriniń birinshi orynbasary Baýyrjan Álenov.
Almaty oblysynyń prokýrory Berik Adamov barlyq tergeý áreketteri Bas prokýratýranyń baqylaýynda ekenin atap ótti.
