Ońtústiktik «Qazyna» bi ansambli Túrkiiada ótken halyqaralyq baiqaýda úzdik atandy
Baiqaýǵa Qazaqstan Respýblikasymen qatar, Ázirbaijan, Chili, Kosovo, Chernogoriia, Grýziia, Belarýs, Argentina, Albaniia, Makedoniia, Qyrǵyzstan, Filippin, Qytai, Bosniia jáne Gertsegovina, Kipr, Moldova, Bashqurtstan, Úndistan, Rýmyniia, Tatarstan jáne Bolgariia syndy 21 memleketten bi ujymdary qatysyp, óz eptilikteri men myqtylyqtaryn tanytty. Bi qimylymen tilsiz óner bailyǵyn pash etken ár eldiń daraboz bishileri ishinen kóshbasshy oryndy qazaqstandyq «Qazyna» bi ansambline berse, ekinshi orynǵa Moldova memleketiniń ónerpazdary laiyq dep tanylyp, «Kúmis Qarakóz» júldesi buiyrdy. «Qola Qarakóz» atalymyna ie bolǵan Grýziianyń bi ujymy úshinshi orynnyń júldesin óz eline arqalai qaitty.
Atalǵan bi baiqaýynyń maqsaty - halyqaralyq óner ujymdarynyń biregeiin anyqtaý jáne ózara qarym-qatynasty arttyrý bolsa, saiysqa qoiylǵan talap deńgeii de kúrdeliligimen erekshelendi. Bi tobynyń sahna mádenieti men árbir qimyl-qozǵalysy, mýzyka yrǵaǵymen bailanysy men óz memleketiniń ulttyq naqyshyn beineleitin kiim úlgisi qazylar alqasynyń nazarynan tys qalmady. Doda barysyndaǵy egjei-tegjeili zerdeleý men bi taktikasynyń sáttilikpen oryndaý sheberligin saraptaý, kil myqtylardyń airyqsha sipattary men óner álemindegi biiktikterin ańǵartty.
Túrkiia Respýblikasynyń Mádeniet jáne týrizm ministrligi, Býrsa Mýnitsipaliteti men Túrksoi Halyqaralyq uiymynyń uiymdastyrýymen ótkizilgen «Altyn Qarakóz» folklorlyq bi baiqaýyna qatysqan «Qazyna» bi ansambline Ońtústik Qazaqstan oblysynyń ákimdigi jáne Qazaqstannyń Túrkiiadaǵy Elshiligi qoldaý bildirdi. Qazaqstan Respýblikasynyń Tuńǵysh Prezidenti qorynyń laýreaty, QR mádeniet qairatkeri Ájibekova Záýre Bekembaiqyzynyń jetekshiligindegi birneshe halyqaralyq, respýblikalyq bi baiqaýlarynda jeńis tuǵyrynan kórinip, kúngei ólkeniń ómirsheń ónerin nasihattap júrgen bi ujymy bul saiysta da qazaqtyń ulttyq ónerin pash etti.
OQO ákiminiń baspasóz qyzmeti
