Ońtústik Jezqazǵan kenishindegi jaǵdaiǵa «Qazaqmys» túsinikteme berdi, dep habarlaidy dalanews.kz.
Kompaniianyń málimetinshe, osyǵan bailanysty eńbek ujymy ókilderimen arnaiy jumys kezdesýi uiymdastyrylǵan.
Kezdesý barysynda taraptar óndiris qyzmetkerlerin alańdatqan máselelerdi ashyq formatta talqylap, usynystar men bastamalarǵa nazar aýdardy.
«Qazaqmys» kompaniialar tobynyń habarlaýynsha, jumysshylar tarapynan aitylǵan barlyq usynystar belgilengen tártipke sáikes qaraýǵa qabyldanyp, odan ári pysyqtalatyn bolady.
Kompaniia ókilderiniń aitýynsha, kóterilgen máselelerdiń basym bóligi óndiristik jabdyqtardyń tehnikalyq jaǵdaiyna qatysty bolǵan. Bul jaǵdai uzaq jyldar boiy jetkiliksiz qarjylandyrý saldarynan qalyptasqan.
Osyǵan bailanysty kompaniia basshylyǵy eńbek jaǵdailaryn jaqsartý, óndiristegi qaýipsizdik deńgeiin arttyrý jáne kásiporyndardyń senimdi jumysyn qamtamasyz etý maqsatynda investitsiialyq baǵdarlamany keńeitýdi jáne ony júzege asyrý qarqynyn jedeldetýdi josparlap otyr.
Sonymen qatar kompaniia eńbek ujymymen ózara is-qimyldy jalǵastyratynyn málimdedi.
«Kompaniia qoldanystaǵy korporativtik tetikter men áleýmettik áriptestik sheńberinde eńbek ujymy ókilderimen ózara is-qimyldy jalǵastyra beredi», – delingen habarlamada.
Qazirgi ýaqytta Ońtústik Jezqazǵan kenishiniń jumysy shtattyq rejimde jalǵasyp jatyr. Óndiristik úderister bekitilgen josparǵa sáikes júzege asyrylýda.
«Qazaqmys» kompaniialar toby eńbek ujymymen ashyq dialog qaǵidatyn ustanatynyn atap ótti. Kompaniia eńbek qaýipsizdigin arttyrý, óndiristi damytý jáne qyzmetkerlerdiń áleýmettik jaǵdaiyn jaqsartý máselelerin jumysshylarmen ózara is-qimyldyń mańyzdy baǵyty retinde qarastyratynyn málimdedi.
