Ońtústik halqy soltústikke qonys aýdarýǵa yntaly
«Elbasy qoiǵan mindetterdiń biri ishki kóshi-qon protsessterin retteý jáne eńbek resýrstarynyń teńgerimdiligin arttyrý, halyqty birkelki jaiǵastyrý maqsatynda eńbek kúshi mol aimaqtan, eńbek kúshi jetispeitin respýblikamyzdyń soltústik óńirlerine óz erkimen halyqty qonystandyrý óte mańyzdy qadam. Jumyssyzdyq, halyqqa áleýmettik qoldaý kórsetý máseleleri boiynsha qiyndyqtar bolýy múmkin, sondyqtan qonys aýdaram deýshilerge kómek kórsetýimiz kerek»-dedi Janseiit Qanseiituly.
Jiynda halyqty ońtústikten soltústikke kóshirý jumystary jóninde baiandaǵan oblystyq jumyspen qamtýdy úilestirý jáne áleýmettik baǵdarlamalar basqarmasy basshysy Muhit Otarshiev 2014-2016 jyldary «Jumyspen qamtý 2020 jol kartasy» baǵdarlamasy sheńberinde oblystan barlyǵy 154 otbasy qonys aýdaryp, kóshý shyǵyndary ótelgendigin jetkizdi.
Onyń aitýynsha, basqarma tarapynan qonys aýdarǵan azamattarǵa sol óńirdegi ýákiletti organdar arqyly monitoring jumystary júrgizilgen. Qazirgi tańda kóship barǵandardyń 48-i aýyl sharýashylyǵymen ainalyssa, 42 azamat bilim salasynda, 11 adam jergilikti atqarý organdarynda, 12 adam qyzmet kórsetý, 7 adam densaýlyq saqtaý salasynda eńbekpen qamtylǵan.
Al, óńiraralyq eńbek naryǵyn damytýdyń sharalaryna 5780 azamat qatysyp, olardyń 2019-y soltústikke qonys aýdarýǵa nietti ekendikterin jetkizgen. Osy azamattardyń 1008 eńbekke qabiletti bolsa, olardyń 116 adamy aýyl sharýashylyǵymen, 98 adam kásipkerlikti damytýmen, 794 adam memlekettik kásiporyndarda jumys isteýge nietti.
Sondai-aq májiliste sóz alǵan oblystyq máslihat depýtaty Jańabai Aǵabekov ońtústik halqyn soltústikke kóshirý erikti túrde júrip jatqandyǵyn alǵa tartty. Olarǵa úkimet tarapynan da aitarlyqtai kómek kórsetiledi. Naqty aitqanda, qonys shyǵyndary esebinde otbasy músheleriniń árqaissyna 35 AEK kóleminde iaǵni 79 myń teńge ótemaqy tólenedi. Budan bólek bir jylǵa deiin páter jaldaýǵa jumsalatyn shyǵyn da memleket esebinen. Áleýmettik qamsyzdandyrý, kóshi-qon kvotasyna da qarjy qarastyrylǵan.
«Kóshý ár adamnyń jeke isi. Eshkimdi kúshtemeimiz. Degenmen niet bildirgenderge jol shyǵyny, baspana jaldaýdy aitpaǵanda, sol barǵan jerine úirenisip ketkenshe, qarjylai kómek beremiz. Jumysqa turýyn da qadaǵalap otyramyz»,-dedi Jańabai Moldabaiuly.
Máseleni qorytyndylai kele óńir basshysy halqy tyǵyz ornalasqan Maqtaaral aýdanynda bul jumystardyń sylbyr júrgizilip jatqandyǵyn synǵa aldy.
Aita keteiik, Maqtaral aýdany halqy óte tyǵyz aýdandardyń birine jatady. Búgingi tańda aýdanda atalǵan másele boiynsha atqarylyp jatqan jumystar jetkiliksiz. Sońǵy eki jylda bar-joǵy aýdannan 12 otbasy ǵana elimizdiń soltústik óńirlerine qonys aýdarǵan.
Soltústik óńirlerge qonys aýdarýǵa nieti bar oblys turǵyndarynyń erikti qonys aýdarýyna yqpal jasaý úshin oblys kásipkerlerin qatystyra otyryp sol óńirlerge is-sapar uiymdastyrýdy júktegen oblys basshysy aýdan, qala ákimderine, salalyq basqarmalarǵa birqatar tapsyrmalar berdi.
