Túrkistan oblysy Tóle bi aýdanynda er adam sibir jarasymen aýyryp qaldy. Qazir ol aýrýhanada emdelip jatyr, dárigerler onymen bailanysta bolǵan adamdardy tekserýde, dep habarlaidy Dalanews.kz. “Almaty” telearnasyna silteme jasap.
Epidemiologtardyń málimetinshe, er adam aýrý maldyń etin bólshekteý jáne jeý kezinde sibir jarasyn juqtyrǵan. Dárigerlerdiń aitýynsha, ol shamamen 10 kún buryn juqtyrýy múmkin, al sebep – maldy soiý kezinde sanitarlyq erejelerdiń buzylýy.
Sanitar dárigerler naýqaspen bailanysta bolǵan taǵy 10 adamdy tekserdi, biraq olardan bul qaýipti aýrý anyqtalǵan joq.
Sanitarlyq qyzmet qazaqstandyqtardy erekshe saq bolýǵa shaqyrady: etti tek resmi saýda oryndarynan satyp alyp, mindetti túrde veterinariialyq mórdiń bolýyn tekserý qajet.
«Er adam siyr etin satyp, jekemenshik qasaphanada jumys istegen. Qazir ol juqpaly aýrýlar bóliminde jatyr. Diagnoz rastaldy, sibir jarasynyń qozdyrǵyshy anyqtaldy. Aýrý veterinardyń ruqsatynsyz aýrý maldy soiý saldarynan paida bolǵan», – dedi Sanitariialyq-epidemiologiialyq baqylaý departamenti basshysynyń orynbasary Aqerke Maqulbekqyzy.
