Ońtústik Qazaqstan oblysynyń 2017 jylǵa arnalǵan biýdjet kólemi jalpy 507,7 mlrd. teńgeni qurap, ótken jylmen salystyrǵanda 23 mlrd. teńgege ósti. Negizinen munda oblystyń áleýmettik, ekonomikalyq mańyzdy salalaryna qajetti qarjy bólindi. Atap aitsaq, oblys aýmaǵynda tótenshe jaǵdailardyń aldyn alý jáne joiý jumystaryn júrgizý úshin 389,4 mln. teńge , aimaqtaǵy 128 mektepti robototehnika kabinetimen jaraqtandyrýǵa 748,2 mln. teńge qarastyrylyp otyr. Búgin bul týraly Ońtústik Qazaqstan oblystyq máslihatynyń kezekti on úshinshi sessiiasynda Ońtústik Qazaqstan oblysynyń ákimi Janseiit Túimebaev málim etti.
Qaita naqtylanǵan biýdjettiń eń kóp sommasy iaǵni-1,5 mlrd teńgesi «Biznestiń jol kartasy - 2020» baǵdarlamasy aiasynda kásipkerlikti qoldaý maqsatyna bólindi.Bul qarjy banktegi nesielerdiń paiyzdyq stavkalaryn sýbsidiialaý úshin qosymsha qaralyp otyr. Biylǵy jyly atalǵan maqsatqa 3 mlrd bólingen bolatyn, endi oǵan 1,5 mlrd.tenge qosylyp jalpy 4,5 mlrd. tengeni qurady. Bul degenimiz bankterden shamamen 37 mlrd. tengege jýyq investitsiia tartýǵa jol ashady, iaǵni kásipkerlerge osy sommaǵa nesie alýǵa múmkindik bar.
«Ózderińizge belgili, Elbasymyz Nursultan Ábishuly Nazarbaev bizge óńirdi damytý boiynsha naqty tapsyrmalar bergen bolatyn. Biz barlyǵymyz sol tapsyrmalardy oryndaýǵa mindettimiz. Sondyqtan da kásipkerlikti jáne áleýmettik salalardy damytýǵa barlyq múmkindikter jasalynyp otyr. Al, Shymkenttegi 4 úidiń qurylysyn jalǵastyrýǵa 554,3 mln. teńge qarastyrdyq. 4 aýyz sý jáne 2 káriz nysandarynyń qurylysyna 495 mln. teńge bólinip otyr. Budan bólek, Shymkent qalasyndaǵy Bozaryq 1,2,3 turǵyn úi alabyn elektrmen qamtamasyz etý qurylysyn jalǵastyrýǵa 200 mln. teńge jumsaityn bolamyz», - dedi J. Túimebaev.
Biyl Túrkistan jáne Kentaý qalalaryndaǵy turǵyn úilerdi jańǵyrtýǵa 491,5 mln.teńge baǵyttalsa, Shymkent qalasyndaǵy burynǵy qoqys poligonyń aýmaǵynda saiabaq salý jáne kóshelerdi jaryqtandyrý jumystaryn júrgizý úshin 400,7 mln. teńge josparlanýda.
Budan bólek, 6 bilim berý nysandarynyń qurylysyn bastaýǵa 55 mln.teńge bólinedi. Al,mindetti áleýmettik meditsinalyq saqtandyrý júiesin engizge jáne ortalyqtandyrylǵan aqparattyq júiesine kóshý baǵytynda densaýlyq saqtaý salasynyń meditsinalyq uiymdaryna 1 732 dana kompiýter satyp alýǵa 346,4 mln. teńge qarastyrylyp otyr. Densaýlyq saqtaý salasyn damytýǵa jalpy 4 emhananyń qurylysyna jáne 2 jobanyń jobalaý-smetalyq qujattamasyna 97 mln. teńge baǵyttalatyn bolady.
Sessiia barysynda oblystyq mańyzy bar 2 avtomobil jolynyń qurylysyn bastaý jáne Astana dańǵylynyń qurylysyn jalǵastyrý úshin 224,4 mln. teńge qarastyryldy.
