Ońtústik Qazaqstan oblysy respýblikamyzda alǵash bop egin orý naýqanyn bastap jiberdi. Qazyǵurt aýdanyndaǵy «Aiqoja» óndiristik koooperativine qarasty egistik alqabyna kombaindar túsip, bidaidyń alǵashqy ónimi qambaǵa jóneltildi. Egis orý naýqanynyń kýágeri bolǵan Ońtústik Qazaqstan oblysynyń ákimi Janseiit Túimebaev aýdan basshylyǵyna aldaǵy jyldary arpa, bidai egis kólemin arttyryp, ony eksporttaý men tuqymdyq sapasyn jaqsartý máselesine nazar aýdarýdy júktedi.
«Ókinishke orai, oblysymyzda tuqymdyq sorttardyń zerttelip, saralanýy joǵary dárejede emes. Sondyqtan sharýalar shamalary kelgenshe jergilikti sorttardy paidalanyp keledi. Osyǵan bailanysty qazir aq egis tuqymdarynyń sapasyn retteý úshin arnaiy baǵdarlama ázirlep jatyrmyz. Sebebi, egin egýde tuqymnyń sapaly bolýy óte mańyzdy»,- dedi Janseiit Qanseiituly.
Jalpy Ońtústik Qazaqstan oblysynda biyl 218 myń gektar bidai egilgen. Odan 401 myń tonna astyq jinalady degen jospar bar. Máselen, bir ǵana Qazyǵurt aýdanynda 38 myń gektar alqapqa arpa-bidai egilipti. Diqandar gektaryna 25,4 tsentnerden ónim jinaimyz dep niettenip otyr.
«Búginde bizdiń kooperativte jer kólemi 12700 gektarǵa jetip otyr. Onyń 6700 gektary tálimdi, 1000 gektary shabyndyq, qalǵany aýyspaly egiske jatady. Ótken jyly 1050 gektar bidai alqabynan 24 tsentnerden qambaǵa 2520 tonna astyq jinadyq»,- deidi «Aiqoja» óndiristik koooperativi tóraǵasynyń orynbasary Saian Batyrbaev.
Qazirgi tańda munda oraq naýqanynda 30-ǵa jýyq adam eńbek etip jatyr. Jumysshylardyń ortasha jalaqasy 60 myń teńgeden joǵary. Kooperativte egin orý naýqanyna tehnika tolyǵymen jetkilikti. Jalpy biyldyń ózinde qazyǵurttyq astyq egýmen ainalysatyn qojalyqtar 32 dana jańa tehnikamen jabdyqtalypty.
