Ońtústik agroónerkásipti damytýdy baqylaýǵa aldy
Alqa májilisine oblys ákimi J. Túimebaev pen orynbasarlary, oblystyq basqarma basshylary, qala, aýdan ákimderi, oblystyq máslihat depýtattary, memlekettik kirister organdary men basqa da ýákiletti jáne quqyq qorǵaý organdarynyń basshylary qatysty.
Alqa májilisinde baiandama jasaǵan oblystyq prokýratýrasynyń birinshi basqarma basshysy Rústem Dúisenbaev otyrǵandardyń nazaryn aýyl sharýashylyq keshenin damytý baǵdarlamasynyń tiimdiligine keri áser etken sýbsidiia bólý protsedýralarynyń buzýshylyqtaryna aýdardy. Sondai-aq ol sharýalarǵa jasalǵan ákimshilik kedergiler men áýre-sarsańdyqqa, qajettilikti durys qalyptastyrmaý jáne biýdjet qarjysyn tiimsiz jaratý máselelerine toqtaldy.
«Aýyl sharýashylyǵyn sýbsidiialaý máselesi boiynsha prokýrorlarmen sommasy 1,7 mlrd teńgeni quraityn myńnan astam zańbuzýshylyqtar anyqtalyp, 26 derek boiynsha sotqa deiingi tergeý bastaldy. Budan bólek, memleketten kórsetilip jatqan úlken járdemge qaramastan jumyssyzdyqpen kúres tásilderi retinde agroónerkásipti qoldaýdyń quraldary tiisti dárejede paidalanbaýda. Qazyǵurt aýdanynda qylmys sanynyń 7 paiyzǵa óskendigi jáne qylmys jasaǵan tulǵalardyń 63 paiyzy jumyssyz ekeni anyqtalyp otyr», - dedi Rústem Tileshuly.
Budan bólek, tekserý nátijesinde 200 myńnan astam zańbuzýshylyqtar anyqtalyp, onyń ishinde 3,5 myńy kásipkerliktiń damýyna keri septigin tigizetin ákimshilik kedergiler, 400 mln. teńgeden astam biýdjet qarjysyn tiimsiz jaratý derekteri áshkerelengen. Sondai-aq salyq óndirý isinde de kemshilikterge jol berilgeni anyqtalǵan.
Aita keteiik, bul prokýrorlyq keshendi tekserý sharasy elimizde pilottyq joba retinde bas prokýrordyń úkimemen júrgizilip otyr. Aldaǵy ýaqytta ózge aýdan qalalarda da jalǵasyn tabatyn bolady.
«Elbasymyz ońtústikke jasaǵan jumys sapary barysynda oblysymyzdy 80 paiyz dotatsiiada otyr dep atap ketti. Jasyratyny joq, óńirde jumyssyzdyqpen kúres, kásipkerlerge qoldaý bildirý, salyq túsimderin molaitý, týrizmdi damytý, óńirge investitsiia salý, sharýalarǵa sýbsidiia bólý, aýyl sharýashylyǵy keshenin damytý maqsatynda qyrýar tirlikter atqarylyp jatyr. Alaida keibir aýdandarda bul jumystar qojyrap, aýdan ákimderiniń jumystarynda júiesizdik bar ekenin baiqap otyrmyz. Aldaǵy ýaqytta barlyq aýdan –qala ákimderiniń jumysy jiti qadaǵalaýda bolady», - dedi Janseiit Qanseiituly.
Alqa otyrysynyń qorytyndysymen jergilikti atqarýshy jáne ýákiletti organdarǵa memlekettik baǵdarlamalardy, sonyń ishinde agroónerkásip keshenin damytý baǵdarlamasyn tiisti dárejede iske asyrmaýdyń sebep-saldaryn joiýǵa baǵyttalǵan usynymdar berildi.
