«ABDI Kompanı» AQ jaqynda 1938 jyldan 1951 jylǵa deıin Qazaq KSR Halyq Komısarlary Keńesin 13 jyl boıy basqarǵan, el ekonomıkasynyń órkendeýine aıryqsha úles qosqan, belgili memleket jáne qoǵam qaıratkeri Nurtas Ońdasynov týraly hronologıalyq  qujattar men materıaldar jınaǵyn basyp shyǵardy. Jınaq  tutastaı muraǵat qujattarynan quralǵan.

N.Ońdasynov jaıly tarıhı qujattar men materıaldardyń sany men sapasy sáıkesken kitap 967 betten turady.  Kitap betterine úńilgen adam N.Ońdasynovtyń belgisiz qyrlarymen tanysyp, qaıratkerdiń jarqyn izderiniń muraǵattyq nusqalarymen tolyq qanyǵa alady. Bir aıta keterligi, N.Ońdasynovtyń qaıratkerligi, atqarǵan qyzmeti týraly osy ýaqytqa deıin mundaı hronologıalyq  kitap jaryq kórmegen. Kitap negizinen tarıhshylarǵa, oqytýshylarǵa, doktoranttar men magıstranttarǵa  arnalǵan.

  Árıne, hronologıalyq qujattardan qurastyrylǵan kitap ǵalymdar úshin taptyrmaıtyn dúnıe. Kitaptyń mazmunynda N.Ońdasynovtyń memlekettik qyzmeti barysynda jazǵan hattary, baıandamalary, májilisterde sóılegen sózderi, májilisterdiń hattamalary, tarıh betterinen, el ekonomıkasynyń damýynan shejireli syr shertetin foto qujattar, májilisterdiń stenogrammalyq teksteri, jedel hattar, qupıa qujattar bóliminen alynǵan tyń derekter faksımıldi kóshirme nusqasynda jarıalanǵan. Qujattardyń bári de muraǵattyq túpnusqadan alynǵan. Qujattar qatarynda sol kezdegi qoǵam belsendileriniń, memlekettik qyzmetkerlerdiń N. Ońdasynovtyń atyna jazǵan hattary sol kúıinde berilgen. N.Ońdasynovtyń tikeleı aralasýymen Qazaq KSR Ǵylym akademıasy ashyldy, Moıynty-SHý temir joly salyndy. El tarıhynda kóptegen mańyzdy isterdiń ońynan sheshilýine yqpal etkenin osy kitaptan oqýǵa bolady.

Kitapty qurastyrýda qujattardy júıelep, jınaǵan QR Ortalyq Memlekettik muraǵatynyń  dırektory Lázzát Aqtaevanyń, osy muraǵattyń Ǵylymı aqparat jumysy jáne ǵylymı-anyqtamalyq apparaty bóliminiń basshysy Gúlnár Qarataevanyń sińirgen eńbegi zor. Al kitapty «ABDI Kompanı» AQ-nyń prezıdenti Ábdibek Bımendıev, baspa bóliminiń ǵylymı redaktory Qanat Óskenbaı  bettep, redaksıalap asa qundy dúnıeni elge usynyp otyr.

ABDI Kompanı» AQ buǵan deıin de «Qazaqstan tarıhy men mádenıetiniń úlken atlasy» jáne «Qazaqtar» degen ultymyzdyń mádenıeti men tarıhyn, jalpy rýhanı qundylyqtaryn tereń nasıhattaıtyn, tarıhı ılústrasıalyq jáne foto-qujattarǵa baı kitaptar shyǵaryp, eldiń qurmetine bólengen bolatyn.

 

Dildágúl Nurmahanbet.