Kúni keshe ǵana Ómirzaq Shókeev Túrkistan qalasyndaǵy birqatar nysandardy aralap, memlekettik qyzmetshilermen, dárigerlermen, turǵyndarmen kezdesti. Qalany aralap júrip, jurtshylyqpen erkin formatta áńgimelesip, pikirlerin, ótinishterin tyńdady.
– Túrkistan óńirindegi ózgeristerdi ózderińiz kórip jatyrsyzdar. Tarihi shahar jańaryp, ózgerýde. Memleket tarapynan úlken qoldaý kórsetilýde. Endi turǵyndar da ózderi turatyn aýmaqty taza ustap, qalanyń gúldenýine úles qosýlary tiis. Ákimniń eń birinshi mindeti – halyqqa qyzmet etý. Arnaiy qalany aralap, eldiń pikirin tyńdap júrmin. Sizderde jaǵdai durys bolsa, ol – biz úshin úlken qýanysh. On bes myńnan astam páter paidalanýǵa berildi, 100 myńǵa jýyq turǵynǵa infraqurylym salyndy. Memlekettik qyzmetshileri men dárigerlerge de qoldaý kórsetilýde. Azamattar memleket senimin aqtap, adal qyzmet etýi tiis, – dedi Ómirzaq Shókeev.
Departamentter úiindegi tis emhanasynyń, ashanasynyń jumysymen tanysý barysynda ol memlekettik qyzmetshilermen júzdesip, pikir almasty. Memlekettik qyzmetshiler men dárigerlerdiń oi-pikirlerin, ótinishterin tyńdady.
Oblys ákimi Túrkistandaǵy jańadan paidalanýǵa berilgen turǵyn úi keshenderiniń turǵyndarymen de kezdesti. «InterKonstrakshn» JShS-i men Rysbekov pen Baialiev kósheleriniń turǵyndarymen júzdesý barysynda olardyń ótinishteri men máseleleri tyńdaldy. Turǵyndar balalar alańshasyn salý, káriz júielerin jetildirý jóninde másele qozǵady. Elmen etene eńbek etip júrgen basshynyń jumysyn oń baǵalady. Óńir basshysy Túrkistan oblysy qurylǵan 4 jylǵa jýyq ýaqyt ishinde Túrkistan qalasyn káriz júiesimen qamtý isi úsh ese artqanyn málimdedi. Bul baǵytta jumystar jalǵasatynyn jetkizdi.
Ómirzaq Shókeev búgin «Aqjaiyq» mýzyka mektebiniń ǵimaratynda Túrkistan qalasynyń turǵyndarymen júzdesti. Kezdesý barysynda oblys ákimi óńir men Túrkistan qalasynda atqarylǵan jumystar jóninde baiandady. Sonymen birge problemalyq máselelerge toqtalyp, Qazaqstandy jańǵyrtýdyń jańa baǵdarynyń negizgi baǵyttary týraly baiandady.
– Memleket basshysy Qasym-Jomart Kemeluly Túrkistan oblysynyń qurylýy tiimdi jáne utymdy bolǵanyn atap ótti. Jalpy, Túrkistan oblysy qurylǵaly beri áleýmettik-ekonomikalyq damý deńgeii edáýir artty. Ekonomikanyń basty kórsetkishi bolyp tabylatyn jalpy óńirlik ónimi 2018 jylmen salystyrǵanda anaǵurlym artyp, 2,6 trln teńgeni qurady. Ónerkásip óniminiń kólemi 707,8 mlrd. teńgeni qurap, 3,6%-ǵa artty, – dedi Ómirzaq Shókeev.
Túrkistan qalasynyń infraqurylymy tolyq qalanyp, shahardy damytýdyń ekinshi kezeńi bastaldy. Sanaq nátijesi boiynsha qala halqy 56356 adamǵa ósip, turǵyn sany 221 102-ge jetti. Jańadan halyqaralyq áýejai, ákimshilik-iskerlik jáne rýhani-mádeni ortalyqtary salyndy.
