Astanada jýyrda Danıar Ótemuratovtyń isi boıynsha úkim jarıalandy. Bul týraly jýrnalıs Mıhaıl Kozachkov jazdy. Al Danıardyń aǵasy Bolat Ótemuratov 2,7 mıllıard dollarlyq baılyqqa ıe, sonyń arqasynda Forbes jýrnalynyń eń baı qazaqstandyqtar tiziminde 2-orynda tur, - dep habarlaıdy Dalanews.kz.
Kozachkovtyń málimetinshe, Bolat Ótemuratovtyń týysy 2021 jyly Atyraýda alaıaqtyq jasaǵany jáne para berýge ıtermelegeni úshin sottalǵan UQK-niń burynǵy qyzmetkeri Tóleýbaevpen tanysqan. UQK burynǵy qyzmetkeri Joǵarǵy sotta aqtalǵysy keletinin, sodan keıin jumysqa qaıta oralýdy kókseıtinin aıtqan. Ótemuratovtar otbasynyń ókili oǵan Prezıdent ákimshiligi men sot organdarynda baılanysy baryn, kómektese alatynyn aıtqan. Osylaısha 50 myń dollar úshin másele sheshiletinin jetkizgen.
Tóleýbaev kelisip, birneshe kúnnen keıin 30 myń ákelgen, sodan keıin onyń jubaıy Danıar Ótemuratovtyń shotyna taǵy 20 myń dollar aýdarǵan. Osydan keıin Ótemuratovtyń týysy joǵalyp ketedi, ol qońyraýlar men habarlamalarǵa jaýap bermeı, aqshany da qaıtarmaı júrip alǵan. Sol kezde Tóleýbaev quzyrly organdarǵa aryz berýge májbúr bolǵan. Biraq Danıar aqsha berýge asyqpaıdy. Byltyr qarashada polısıa ony tutqyndaýǵa ruqsat alǵannan keıin ǵana 50 myń dollardy birden qaıtarǵan.
Al sotta Ótemuratov kinásin tolyq moıyndap, ókinip, isti qysqartylǵan tártippen qaraýdy ótingen. Ol sol kezde Qyzylorda oblysynda qandaı da bir nysan salyp jatqanyn jáne armatýrany tóleýge qarajaty jetpegenin málimdegen. Onyń Joǵarǵy sotta jáne Prezıdent ákimshiliginde eshqandaı tanystary bolmaǵanyn da jetkizdi.
Aqyrynda Danıar Ótemuratov alaıaqtyq jasaǵany úshin kináli dep tanylyp, 5 jylǵa shartty merzimge sottaldy. Kozachkov bul tusta sybaılas jemqorlyq qylmysy da baryn aıtady. Alaıda Ótemuratov mundaı qatań senarı boıynsha sottalmaǵan.
