Belgili qarjy sarapshysy Aibar Oljai premer-ministr Oljas Bektenovtiń úkimettegi jumysy týraly aitty, dep habarlaidy Dalanews.kz.
Sarapshynyń sózinshe, Qazaqstan Úkimeti 2025 jyly fenomenaldy jumys nátijesin kórsete bildi.
"Biz tuńǵysh ret munai baǵasy óspegen ýaqytta ishki jalpy ónimniń 6,2 paiyzǵa ósýin tirkep otyrmyz. Sebebi dál osylai ósken 2011 jylmen salystyrsaq, 13 jyl buryn bizge qara altyn baǵasynyń sharyqtaýy kómektesken edi", - deidi sarapshy.
Úshinshi toqsanda týra osy qarqyndy saqtai alsaq, onda 2025 jyly qazaq ekonomikasy 300 milliard dollardan asatyn bolady.
"Aqyryndap Vetnammen iyq tiresetin jaǵdaiǵa jetemiz. Onymen qosa, Resei ekonomikasymen 10 ese alshaqtyǵymyz edáýir qysqaryp, endi biz Reseiden ekonomika kólemi boiynsha baiaǵydai 10 emes, 7 ese az bolyp turmyz. Biyl biz ekonomikanyń san boiynsha emes, sapa boiynsha óskenin kórdik. Ósim kólik pen logistika (22,7%), qurylys (18,4%), taý-ken ónerkásibi jáne saýda (8,4%), óńdeý ónerkásibi (5,5%) arqyly keldi. Qazaq eli shyn máninde indýstriialanýda. Ekonomika qurylymyndaǵy óńdeý ónerkásibiniń úlesi 2024 jyly 12,2%-ǵa deiin ulǵaiyp ketken. Buryn diversifikatsiia biz úshin qaǵazǵa jazylǵan kúrdeli sóz bolsa, endi jańa formattaǵy menedjer Oljas Bektenov is júzinde diversifikatsiianyń qalai bolatynyn kórsetti", - deidi Aibar Oljai.
Bul tek basy ǵana. Endi Bektenovtyń senimdi serigi Serik Jumanǵarin jaqyn arada qazaq eline ekonomikany tiimdi ósirý baǵdarlamasyn jariialamaq.
"Onyń negizgi parametrleri daiyn. Baǵdarlama boiynsha Qazaqstan optimaldy áreket etetin bolady. Iaǵni kapital óńdeý, taý-ken ónerkásibi, agroónerkásiptik keshen jáne infraqurylym siiaqty eń perspektivaly salalarǵa nysanaly dáldikpen baǵyttalmaq. Memlekettiń ǵana emes, Oljas Bektenovtyń de ishki transformatsiiasy baiqaldy. Ol birinshi ret jýrnalister aldyna erkin shyǵyp, aýqymdy baspasóz konferentsiiasyn berdi. Eshbir suraqtan qashpady. Bárine jaýap berdi. Qiyn suraqtar arasynda baǵa, tarif, jumyspen qamtý siiaqty taqyryptar bar edi", - deidi sarapshy.
Qoǵammen dialog tek jetistikterdi aitýmen ǵana shektelmeidi.
"Ol sheshýdi qajet etetin názik máselelerdi ashyq talqylaýmen baǵalanady. Mundai ózara áreket etý stili senimdi nyǵaityp, jalǵan aqparat taratý qaýpin azaitady. Ekonomikanyń ósýimen qatar, Abaiuly da saiasatker retinde jaqsy ósip keledi. Onymen eshkimniń talasa almaityny haq", - deidi Aibar Oljai.
