Jetisý oblysyna jumys sapary aiasynda QR Premer-Ministri Oljas Bektenov óńirdiń birqatar kásipornyna baryp, Memleket basshysynyń óńdeý ónerkásibin damytý jáne aýyl sharýashylyǵy ónimderin tereń óńdeý kólemin ulǵaitý jónindegi tapsyrmalarynyń iske asyrylýyn tekserdi, – dep habarlaidy Dalanews.kz.
Taldyqorǵan qalasynda Premer-Ministr aýyl sharýashylyǵy ónimderin óńdeýde jetistikter kórsetken «JLC Sút» sút óndirý kásipornyna bardy. Sút zaýyty – aýyl sharýashylyǵy ónimderin óńdeýmen ainalysatyn óńirdegi negizgi kásiporyndardyń biri.
«JLC Sút» JShS tsehynyń basshysy Ámina Arynbekova kásiporynnyń óndiristik qýaty jylyna 25 myń tonnaǵa jetetinin málimdedi. Jartyjyldyq qorytyndysy boiynsha 5,4 mlrd teńgeniń ónimi óndirildi. Táýligine 80 tonnadan 90 tonnaǵa deiin sút óńdeledi, 62 ónim túri shyǵarylady. Kásiporynda 240 adam jumys isteidi.
Munda Úkimet basshysyna AÓK-tiń 2024-2026 jyldarǵa arnalǵan damý josparlary týraly aqparat berildi. Osy kezeńde jalpy quny 33,2 mlrd teńgeni quraityn 31 investitsiialyq jobany iske asyrý kózdelgen, onyń 13 jobasy biyl iske qosylady. Azyq-túlik ónimderiniń kólemi 3,6%-ǵa – 90 mlrd teńgege deiin artady, sondai-aq et (110,9 myń tonna), sút (225,3 myń tonna) jáne qant (96 myń tonna) óndirý kórsetkishterine qol jetkiziledi dep kútilýde.
Premer-Ministr Aýyl sharýashylyǵy ministrligi men oblys ákimdiginiń nazaryn AÓK-degi birqatar mindetke aýdardy. Jetisý oblysy aýyl sharýashylyǵynda qant qyzylshasyn (QR-daǵy úlesi – 42%), júgerini (18%) jáne soiany (72%) óndirýge mamandanǵan. Salany damytýdyń 2022-2026 jyldarǵa arnalǵan keshendi josparyna sáikes qant qyzylshasynyń alqabyn 2026 jylǵa qarai 15 myń gektarǵa deiin jetkizý qajet. Ákimdikke tuqym qoryn jáne mineraldy tyńaitqyshtardyń jetkilikti kólemin qamtamasyz etý jóninde sharalar qabyldaý tapsyryldy.
Sýarmaly eginshilik salasynda sýarý jelilerin jóndeý-qalpyna keltirý jumystaryn merziminde aiaqtaý jáne 2026 jylǵa qarai sý berýdi 30,5 myń gektarǵa jaqsartý, sondai-aq jańadan 5,3 myń gektar sýarmaly jerdi paidalanýǵa qosý tapsyryldy.
Mal sharýashylyǵy salasynda turaqty ósý úrdisi baiqalady. Osy jyldyń basynan beri mal basy 26,3%-ǵa ósti. Mal sharýashylyǵyn damytý sheńberinde biyl 1140 mal basyna arnalǵan 3 taýarly-sút fermasyn keńeitý, 1200 basqa arnalǵan 1 taýarly-sút fermasyn ashý jumystary júrgizilýde jáne 200 mal basyna arnalǵan 1 bordaqylaý alańyn iske qosý josparda bar.
– Jetisý oblysy agrarly óńir bolyp sanalady. Úkimet óńirdiń AÓK-ne qajetti qoldaý kórsetip keledi. Tek biyldyń ózinde 34,9 mlrd teńge, onyń ishinde 23,2 mlrd teńge sýbsidiia bólindi. Jalpy, "Iri jobalar" jáne "Aýyl amanaty" baǵdarlamalary aiasynda oblysqa 9,8 mlrd teńge bólindi. Osy baǵdarlamalardyń iske asyrylýyn jáne mal sharýashylyǵy ónimin óndirý jáne qaita óńdeý boiynsha jańa kásiporyndar ashýdy qamtamasyz etý qajet, – dep atap ótti Oljas Bektenov. Premer-Ministr elimizdiń azyq-túlik qaýipsizdigin qamtamasyz etý úshin aýyl sharýashylyǵy ónimderin tereń óńdeý kólemin ulǵaitý qajet ekenin atap ótti.
Buǵan qosa, jumys sapary barysynda Oljas Bektenov óńirdiń iri ónerkásiptik kásiporny – avtomobil akkýmýliatorlaryn shyǵaratyn «Qainar AKB» zaýytyna bardy. Zaýyt ónerkásip óndirisiniń 33,6%-yn qamtamasyz ete otyryp, Taldyqorǵan qalasynyń ekonomikasynda mańyzdy ról atqarady. Óndiristik qýaty – jylyna 3,6 mln dana, jumys isteitin qyzmetkerler sany – 1 212 adam.
