Premer-Ministr Oljas Bektenov jumys saparymen elimizdiń batysyna bardy. Basty maqsat – Memleket basshysynyń sý tasqynynan zardap shekken azamattardy baspanamen qamtamasyz etý jónindegi tapsyrmalarynyń oryndalý barysyn tekserý.
Jumys kestesinen artta qalý baiqalǵan Batys Qazaqstan jáne Aqtóbe oblystarynyń aýyldary men kentterine basa nazar aýdarylady (biylǵy 17 shildedegi Premer-Ministrdiń tóraǵalyǵymen ótken Sý tasqynynan keiin turǵyn úiler men infraqurylymdy qalpyna keltirý máseleleri jónindegi keńes).
Batys Qazaqstan oblysynda Úkimet basshysy Terekti aýdanyndaǵy Podstepnoe aýylynda, Derkól kentinde jáne Oral qalasyndaǵy «Juldyz» yqshamaýdanynda boldy, munda jalpy sany 400-ge jýyq turǵyn úi qurylysy júrgizilýde. Tekserý barysynda aldaǵy sýyq mezgildi eskere otyryp, jumys qarqyny men turǵyn úi infraqurylymynyń qonystanýǵa daiyndyǵyn qamtamasyz etý merzimderi baǵalandy. 
Terekti aýdany Podstepnoe aýylynda 3 bólmeli 106 turǵyn úidiń qurylysy júrip jatyr. Jumys biylǵy mamyr aiynda bastalǵan bolatyn. Búginde irgetasyn quiý jumysy tolyǵymen aiaqtaldy, 43 úidiń qabyrǵasy turǵyzylyp jatyr, 62 úidiń shatyry jabylýda. Nysandarǵa 8 merdiger uiym, shamamen 330 adam jáne 56 tehnika jumyldyrylǵan. Tamyz aiynyń ortasynda paidalanýǵa berý kózdelgen.
Derkól kentinde 103 turǵyn úi jańa ýchaskelerde salynyp jatyr. Qazirgi ýaqytta irgetas quiý jumystary tolyǵymen aiaqtaldy, 24 nysanda ishki árleý júrgizilip jatyr. Oǵan 5 merdiger uiym jumyldyryldy. Jumys biylǵy qyrkúiek aiynda aiaqtalady dep josparlanǵan. 
Oral qalasynyń «Juldyz» yqshamaýdanynda 191 nysan jańa jerde salynyp jatyr. Turǵyn úilerdi ýaqytyly tapsyrý úshin 17 merdiger mekeme jumysqa tartyldy. Búgingi tańda barlyq úidiń irgetasy quiylǵan, 178 úidiń qabyrǵasy qalanýda, 49 nysannyń shatyry jabylyp jatyr.
Premer-Ministr sý tasqynynan zardap shekken turǵyndardy jańa baspanamen ýaqytyly qamtamasyz etý úshin jumys barysyn qatań baqylaý qajettigin atap ótti.
«Óńir qajetti qarqyn alýy kerek. Sapaly, qaýipsiz jáne jaily turǵyn úimen qamtamasyz etý mindeti – Úkimettiń negizgi basymdyǵy. Barlyq qurylys nysandarynda baqylaýdy kúsheitý qajet. Oblysta baspanalaryn kútip, ýaqytsha jerlerde turyp jatqan otbasylar qatary kóp. Qurylys jumystaryn jedeldetip, 2-3 aýysymdyq jumys kestesine kóshý qajet. Tolyq jumyldyrýdy qamtamasyz etýdi tapsyramyn», — dedi Oljas Bektenov.
Sonymen qatar injenerlik jelilerdi, jol jáne áleýmettik infraqurylymdy qalpyna keltirý boiynsha tapsyrmalar berildi. Salynyp jatqan aýdandarda ilespe infraqurylym men abattandyrýdy aldyn ala qarastyrý qajet. Jańa turǵyn aýdandardyń janynda 1 500 orynǵa arnalǵan «Jaily mektepterdiń» qurylysy júrgizilýde. Oblys ákimdiginiń málimetinshe, jumystar biylǵy kúzde aiaqtalady.
Anyqtama: Úkimet sý tasqyny saldaryn joiý jáne zardap shekken azamattarǵa jan-jaqty kómek kórsetý boiynsha jumysty jalǵastyrýda. 70 myńnan astam adam óz úilerine oraldy. Zardap shekken aimaqtarda turǵyn úilerdiń 100%-y tekserildi. Jalpy somasy 44,2 mlrd teńgege 7 823 otbasy baspanasyn jóndeýge jáne qalpyna keltirýge ótemaqy aldy. 3 987 otbasy qiraǵan baspanasynyń ornyna jańa úi men páterlerge qonystandy. 2 578 úi salynyp jatyr. 34 023 otbasy 12,5 mlrd teńgeden astam somaǵa 100 AEK mólsherinde birjolǵy tólem aldy. 20 913 otbasyna jalpy somasy 9,5 mlrd teńgege 150 AEK-ke deiingi mólsherde joǵalǵan birinshi qajettiliktegi zattaryn satyp alý úshin qosymsha ótemaqy tólendi. Sýǵa ketken mal úshin berilgen memlekettik kómek kólemi 2,8 mlrd teńgeden asty. Zardap shekken bizneske keltirilgen zalaldy óteý boiynsha ShOB sýbektileriniń jalpy somasy shamamen 1,5 mlrd teńgege 252 ótinimi qaralyp, maquldandy.
