Senator Olga Perepechinanyń aitýynsha, sóite túre shetelge shyǵarylǵan qarajattan Qazaqstanǵa kók tiyn da qaitpaǵan.
"Shetel asqan aqshanyń naqty somasyn anyqtap aita almaimyz. Sebebi bizde buǵan jaýap beretin arnaiy ortalyq joq. Tax Justice Network halyqaralyq uiymy taratqan málimet boiynsha, sońǵy 20 jylda Qazaqstannan ofshorlyq aimaqtarǵa shamamen 140 mlrd dollar aýdarylǵan", – deidi Perepechina.
Senator keltirgen dáiekke sáikes 2015-2019 jyldyń aralyǵynda Qarjy ministrliginiń nusqaýymen shetel asqan aqshaǵa qatysty 238 qylmystyq is qozǵalypty. Solardyń arasynda tek úsheýi ǵana sotqa jetken.
"Shamamen 170 is qylmystyq quramy dáleldenbegendikten toqtatyldy. Iá, aqshanyń shetel asqany anyq. Alaida Qazaqstannyń zańy boiynsha bul quqyq buzý dep tabylmaidy", – deidi Perepechina.
Al sotqa deiin jetken úsh qylmystyq is boiynsha aqshany keri qaitarý qarastyrylmapty, sebebi Qylmystyq-protsessýaldyq kodekste aqshany keri qaitarý týraly talap joq.
Senator osy rette Úkimetbasy Mámin men Bas bankir Dosaevqa saýal joldady.
"Qazirgi qoldanystaǵy zań syrtqa aǵylǵan kapitaldy elge qaitarýǵa qaýqarsyz. Bul tarapta naqty taldaý júrgizip, ekonomikalyq zertteý jasaý qajet.
Qazaqstanda qyrýar aqshany zańdy túrde shetelge alyp shyǵatyn san túrli joldar bar. Tipti qarajatty zańsyz alyp shyqqany dáleldense de, ony shetelden keri qaitaratyn talaptar qoldanystaǵy zańda qarastyrylmaǵan.
Jalpy Úkimettiń kapitaldy keri qaitarýǵa qatysty ne bilgeni bar? Munymen naqty qai memlekettik organnyń ainalysaryn anyqtap alý qajet", – deidi senator.
