Oblys ákimderi qabyrǵasy áinekten jasalǵan kabinette otyrady - Shpekbaev
"Bunyń bári birtindep jasalady. Qazir ol jaqta keibir ǵimarattar keńestik zamanda salynǵan. Ony qaita salyp shyǵý múmkin emes. Al jańa ǵimaratta mindetti túrde bolady", - dedi Shpekbaev jýrnalisterge bergen suhbatynda.
Agenttik basshysy osy saladaǵy jumystyń kezeń-kezeńimen atqarylatynyn jetkizdi. Aýdan ákiminen bastap barlyq sheneýnik ashyq kabinette otyrady.
"Mysaly, qazir aýdan ákimderi birinshi qabatta shynymen bólingen kabinette jumys isteidi. Ýaqyt kerek. Men Almaty oblysynda bolǵanmyn. Departament basshylary da, aýdan ákimderi de, aýyl ákimderi de solai. Birtindep jasalady. Bárin bir kúnde jasaý múmkin emes", - dep atap ótti Shpekbaev.
Onyń aitýynsha, barlyq memlekettik organdy transformatsiiadan ótkizý josparlanyp otyr. Sonda olardyń jumysy ashyq, al halyqqa qoljetimdi bolady.
"Biz osy jumysty jalǵastyra beremiz. Qazirdiń ózinde biraz sharýa atqaryldy. Aýdan ákimderiniń barlyǵy osy standartqa aýysty deýge bolady. 1 400 uiym Open space formatynda jumys istedi. Shamamen, 900 front-ofis ashyldy", - deidi Shpekbaev.
Aita keteiik, jaqynda agenttik basshysy óziniń Facebook paraqshasynda bilim berý men densaýlyq saqtaý mekemelerine jetekshilik etetin 5 myńnan astam basshynyń birinshi qabatqa kóship, sol jerdegi shyny kabinetke ornalasqany jaiynda jazdy.
