Oblys basshysynyń aitýynsha, jalpy áleýmettik qamsyzdandyrý salasyna 2019 jyly 82 mlrd.teńge qarjy qarastyrylǵan.
Atap aitsaq, byltyr ataýly áleýmettik kómekke 70 mlrd. teńgeden astam qarajat bólingen. Bul soma ózge jyldarmen salystyrǵanda anaǵurlym qomaqty. Sonyń nátijesinde oblys halqynyń úshten bir bóligi ataýly áleýmettik kómek aldy nemese ár otbasy orta eseppen aiyna 100-120 myń teńge kóleminde áleýmettik kómekpen qamtyldy.
Kómek alýshylardyń 60 paiyzy kóp balaly otbasylar sanatynan. Osyndai qoldaýdyń arqasynda 6 690 otbasy áleýmettik kómek esebinen óz isin ashýǵa jáne óz tabysyn arttyrýǵa múmkindik alyp, 43 myń jumyssyz azamat ataýly áleýmettik kómek aiasynda jumyspen qamtyldy.
Biylǵy jyly da áleýmettik qoldaýda eleýli ózgerister oryn aldy. Birinshiden, kóp balaly otbasylardyń mártebesin arttyrý maqsatynda olar jeke sanatqa shyǵaryldy.
Iaǵni, 2020 jyly otbasynyń tabysyna qaramastan 4 jáne odan da kóp balaly otbasylarǵa bala sanyna qarai 43 myńnan 73 myń teńge aralyǵynda memlekettik járdemaqy taǵaiyndaý bastaldy, qazirdiń ózinde 100 myńnan astam otbasy osy járdemaqyny aldy.
Ekinshiden, áleýmettik qoldaýda ádilettilikti qamtamasyz etý jáne azamattardy eńbekke yntalandyrý maqsatynda ataýly áleýmettik kómek kórsetý júiesi jetildirildi: otbasynyń tabysyn esepteý kezinde kóptegen áleýmettik tólemder alynyp tastaldy, 1 jastan 18 jasqa deiingi balalarǵa kepildirilgen áleýmettik paket engizildi.
Úshinshiden, memlekettik baǵdarlamalardan bólek, Túrkistan oblysynda «Nur Otan» partiiasynyń bastamasymen ómirlik qiyn jaǵdaiǵa tap bolǵan otbasylardy kedeilik deńgeiinen shyǵýǵa umtyldyratyn «Qamqorlyq» baǵdarlamasy ázirlendi.
Baǵdarlama aiasynda tiimdi jumyspen qamtýdy qamtamasyz etýge jáne kásipkerlik qyzmetti damytýǵa erekshe nazar aýdarylatyn bolady. Otbasylardy turaqty tabys kózimen qamtamasyz etý nátijesinde olardy ómirlik qiyn jaǵdaidan kezeń-kezeńmen shyǵarý kózdelýde.
Atalǵan baǵdarlama aiasynda júrgizilgen jumystar nátijesinde jaǵdaiy tym tómen, krizistik jáne qanaǵattanarlyqsyz deńgeide ómir súrip jatqan 1643 otbasy anyqtalyp, olardyń árqaisysyna materialdyq kómek pen qajetti keńes beretin arnaiy kýratorlar taǵaiyndaldy.
Qazirdiń ózinde baǵdarlama bastalǵaly beri ómirlik qiyn jaǵdaiǵa tap bolǵan 900-dan astam otbasylarǵa 45 mln.teńgeniń demeýshilik kómegi kórsetilip, 4 otbasyǵa kásipkerler tarapynan úi satyp alyndy.
Budan bólek, «Qamqorlyq» baǵdarlamasy arqyly januia múshelerin jumysqa turǵyzý, oqytý jáne ózge de máseleleri aýdan, qala ákimderini baqylaýynda bolady.
