Abai.kz jariialaǵan atalmysh hatqa elimizdegi birqatar aqparat quraldary men áleýmettik jeli qoldanýshylary ún qosyp, internet betinde osy otbasynyń jaiy biraz talqyǵa tústi. Sol-aq eken Nurtileýdiń otbasyna kómek qolyn sozǵysy keletin azamattar kóptep tabylyp, Nurtileýdiń otbasy úili boldy.
Endi mine, bir jasar Nurtileýimiz el azamattaryna alǵys aityp, taǵy da hat joldapty. Osy otbasynyń úili bolýyna Abai.kz aqparattyq portaly azdy-kópti yqpal etken soń, dástúr boiynsha sábi Nurtileýdiń bir sózin de ózgertpei, onyń Alash jurtyna alǵys hatyn jariialap otyrmyz.
EL AZAMATTARYNA ALǴYS HAT
Qurmetti qazaq halqynyń janashyr azamattary, qurmetti Amandyq ata! Meniń, meniń otbasymnyń Sizderge degen rizashylyǵyn aýyzben aityp jetkizý múmkin emes. Qatty qýanyshtymyz! Óitkeni, Sizderdiń arqańyzda úili boldyq. Úidiń kilti, qujaty, mine, qolymyzda.
Ótkende Almaty oblysynyń ákimi Amandyq Batalovqa osy Abai.kz aqparattyq portaly arqyly úshbý hat joldaǵan edim. Sol hatym ózge de aqparattyq saittarda jariialanyp, birneshe kún áleýmettik jelilerde talqylandy. Meniń sábi júregimdi jaryp shyqqan janaiqaiym biraz jurttyń janashyrlyq sezimin oiatsa kerek. Bir-aq kúnde bizdiń ómirimiz ózgerip sala berdi.
Anamnyń janaryndaǵy jas qýanyshtan tógildi. Ákemniń qabaǵyndaǵy muń áp cátte seiildi. Baýyrlarym áne, qoldaryna Abai.kz saitynda jariialanǵan maqalany qaǵazǵa shyǵaryp alyp, "biz el-jurttyń arqasynda úili bolatyn boldyq" dep asyr-salyp oinap júr.
Bizdi tanityn tanystarymyz, týystarymyz, kórshilerimiz, bári-bári Sizderge, el azamattaryna, Amandyq ataǵa alǵystaryn jaýdyrýda.
Shynymdy aitaiyn, men tús kórip jatqan siiaqtymyn. «Bul oqiǵalar óńimde bolyp jatyr» degenge áli sene alar emespin. Meniń, meniń otbasymnyń «óz úii, óleń tósegi» bar endi. Syz eden, syzdanǵan qabyrǵa, kók iisten birjola qutylatyn boldyq.
Ákem jalǵa alatyn páter izdep talai esikti tozdyryp edi. Páterden páter aýystyryp júrip, biz ne kórmedik?. Kimniń jábir sózin estimedik?. Onyń bári artta qaldy. Umytylady, áli-aq!
Qurmetti oqyrman qaýym! Men Sizderge Ózimizdiń úiimizdiń sýretin kórsetip maqtanaiynshy. Mine, bizdiń úi. Sizderdiń bizge syilaǵan úilerińiz... Biraq, bul úidiń burynǵy egeleri áli kóship úlgermei jatyr. Úidiń ishindegi jihazdar sol kisilerdiki.
Ádemi, iá! Endi áke-sheshem kómir jaǵyp áýre bolmaidy. Ashanamyz da – keń. Úsh jatyn bólmemiz bar. Qonaq bólmemiz – at shaptyrym. Dýman aǵam endi máshinesimen aiaq-qolymdy basyp ketpeidi. Qaisar aǵam sabaǵyna keń bólmede otyryp daiyndalatyn bolady. Mektebimiz úige tiip tur. Mundai úide turǵan bala ózin «baqyttymyn» deýge tolyq quqyly. Men baqyttymyn, biz baqyttymyz!
Ákem aitady: "Bizge qol ushyn sozǵan azamattardyń jaqsylyǵy Qudaidan qaitsyn» dep...
Bilesiz, biz shańyraqta – segiz ulmyz. Áleýmettik jelilerde «jaǵdaiy joq bola tura, munsha balany nege taba bergen?» degender de boldy. Anamnyń armany – qyzdy bolý. Ol kisi ylǵi da: «Qyzym bolsa, sender ana syilaýdy, jar syilaýdy úirener edińder» dep otyrady. Demek, bizge qaryndas kerek. Ol qaryndasym Qudai qalasa, dańǵaradai úide ómir esigin ashatyn bolady.
Al, endi meniń baýyrlarymnyń Sizderge degen alǵysyn qabyl alyńyzdar...
Úidiń ishi qazir dál osyndai Alǵys hattarǵa tolyp ketti.
Munyń bári qýanyshtan bolyp jatqanyn túsingeisiz.
Osy hatty oqyp otyrǵan ár azamatqa alǵysym sheksiz. Meniń janaiqaiymdy búkil Qazaqstanǵa taratqan Abai.kz aqparattyq portalyna, sonymen qatar osy taqyrypty ilip áketken búkil qazaq saittaryna – rizamyz. Bizdiń jaiymyzǵa alańdap, ún qosqan ár qazaqqa «jasaǵan jaqsylyqtaryńyz Alladan qaitsyn» degim keledi. Tipti keibir azamattar «jeke shot ashyńdar, kómek retinde aqsha aýdaraiyq» dedi. Oǵan ákem men anam qarsy boldy. «Bizdiń Atymtai jomart azamattar syilaǵan úiimiz bar, úii bar adam eshkimge qol jaimaýǵa tiis» deidi olar. Ata-anamnyń bul oiy durys emes pe?!
Keshe ákem men anam úidiń qujattaryn ákep: «Bul úidiń iesi – sensiń» dedi. Qujattardy tekserip kórdim. Bári durys eken.
Qurmetti oqyrman, Sizderge aitatyn sózim óte kóp... Biraq, sol sózdiń bárin tizsem de, meniń shattanǵan kóńilimniń pernesin dál basa alatyn emes. «Aýyzben aityp jetkize almaityn qýanysh bolady» deidi ǵoi úlkender. Bizdiń qýanyshymyz – dál sondai qýanysh.
Ár qazaqtyń úiinde osyndai shat kúnder mol bolsyn!
Bai, qýatty bolaiyq!
Sálemnen, bir jasqa tolmaǵan Nurtileý balalaryńyz...
P.S. Búgin Almaty oblysynyń ákimi Amandyq Batalov arnaiy Talǵar qalasyna baryp, Nurtileýdiń tilegin oryndaǵan kásipkerler men atymtai jomart azamattarǵa alǵysyn aitty. Sondai-aq, Nurtileýdiń hatty qatty áser etkenin, sol úshin de osy bir qýanyshty bólisý úshin kelgenin tilge tiek etti.
Derekkóz: Abai.kz
