Qurmetti mańǵystaýlyqtar!
Qadirli jerlester!
Bul jaǵdaıdyń barshamyzdyń kóńilimizge qaıaý túsirip otyrǵany jasyryn emes. Osy sátte biz ashý ústinde asyǵys sheshim qabyldamaı, sabyr saqtaǵanymyz jón.
Biz kez-kelgen túıtkildi másele men qıyndyqtardy aqylmen sheship, abyroımen alyp kelemiz.
Qoǵamdaǵy shıelenisti odan ári ýshyqtyrý, zań men quqyqtyq normalardy buzý, bul – jaǵdaıdyń turaqsyzdanýyna ákeledi, máseleni sheshpeıdi.
Ardaqty aǵaıyn!
Barshańyzdy sabyr saqtap, el tynyshtyǵyn buzbaýǵa shaqyramyn!
Biz bul jaǵdaıdyń tek zań sheńberinde ádil sheshilgenin qalaımyz. Barshamyzdyń maqsatymyz bir – erteńgi kúnge degen senimdilik pen eldiń amandyǵy, jurttyń tynyshtyǵy.
Qazir ásirese arandatýshylarǵa erip ketpeı, olardyń el ishine iritki salyp, tynyshtyqty buzýyna jol bermeýimiz qajet.
Bárimizdiń maqsatymyz bir. Halqymyz adal eńbek etip, atqarǵan jumysyna saı eńbekaqysyn alyp, erteńine senimmen qarap, syılastyqta ómir súrýdi qalaımyz, jáne ony júzege asyrý úshin jumystanýdamyz.
Kásiporyndarda tynyshtyq pen turaqtylyqtyń bolǵany bárimiz úshin de tıimdi.
Qadirli aǵaıyn!
Qazir Qasıetti Ramazan aıy – meıirim men rýhanı tazarý aıy. Biz Sizdermen osyǵan deıin birlesken kúsh-jigerimizdiń arqasynda talaı syn-saǵattardan óttik oǵan tarıh kýá. Bul túıtkildi de aýyzbirshilikpen, yntymaqpen eńseremiz dep senemin.
Halqymyz tynysh, el irgesi – bútin bolsyn!
