6 qazan elimizde AES qurylysy jónindegi jalpyhalyqtyq referendým ótedi. Prezident Toqaev pármen berip, Qazaqstan qoǵamy úshin asa mańyzǵa ie osy elektoraldy protsess ótetin bolyp bekitildi, dep habarlaidy Dalanews.kz.
AES qurylysyna qatysty qoǵam pikiri ártúrli. Ony jaqtaýshylar da, oǵan qarsylar da bar jáne taraptar óz pikirlerin qoǵam talqysyna ashyq salýda.
Dese de, "AES qurylysy týraly sheshimdi referendým arqyly, halyq pikirimen sanasa otyryp qabyldaimyz", - degen saiasi bilik mańyzdy saiasi naýqandy bastap ketti.
Kez kelgen saiasi naýqannyń taǵy bir ajyramas bóligi – táýelsiz baqylaýshylar ekeni anyq. Táýelsiz baqylaýshysyz ótken sailaýdy zańdy, ádiletti ári shynaiy dep aitýǵa bolmaidy.
Referendýmǵa bailanysty el boiynsha baqylaýshylyq jasaityn uiymdar men bastamashyl toptardyń sany artýda. Baqylaýshylyq jasaimyz dep bastama kótergenderdiń biri saiasattanýshy Nurbolat Nyshanbai boldy.
Saiasattanýshy Nurbolat Nyshanbai óziniń áleýmettik jelidegi paraqshasynda "Baqylaý qyrandary" atty táýelsiz baqylaýshylar tobyn jasaqtaitynyn habarlady.
"Saiasattanýshy retinde maǵan elimizdegi, qoǵamdaǵy ár protsess qyzyqty, ári mańyzdy. Azamattardyń saiasi belsendiligi, azamattyq qoǵamnyń qalyptasýyna yqpaly, sailaýǵa halyqtyń qanshalyqty belsendi qatysýy árqashanda men úshin mańyzdy.
Jeke tájiribemde, álemniń birshama elinde boldym, oqydym, tájiribe almastym. Uqqanym, damyǵan kez-kelgen birtutas qoǵam úshin sailaý, referendým memlekettik deńgeide mańyzdy shara. Eýropada oqydym, muhittyń arǵy shetindegi Aýstraliiada bilim aldym. Tek bilim almai, jergilikti halyqtyń turmys salty men áleýmettik belsendiligin qatar meńgerdim", - degen saiasattanýshy Eýropa elderinniń elektoraldy protsessterinen kórgen-túigenderi men Qazaqstandaǵy saiasi naýqandardy salystyra otyryp, alda bolatyn referendýmda táýelsiz baqylaýshylar tobyn jasaqtaitynyn aitady.
"Endi úsh aptadan keiin elimizde referendým ótedi. Bul referendýmnyń mańyzy da, máni de ózgeshe. Sebebi osyǵan deiingi referendýmdar prezident merzimin uzartý, konstitýtsiiaǵa qatysty bolsa, bul joly AES salyna ma, joq pa degen suraqqa halyq tańdaý jasaidy. Saiasattanýshy bolǵan soń bundai protsessterden qalys qala almaimyz", - deidi saiasattanýshy.
Referendým kúni resmi bekitilgenen bastap elimizdiń túkpir-túkpirinde, sonyń ishinde Almaty, Astana sekildi Qazaqstan saiasatynyń mańyzdy draiverlerinde saiasi naýqandardy (sailaý, referendým) baqylaityn uiymdar qazir belsendiligin arttyrýda.
"Saiasattanýshy retinde biylǵy saiasi naýqanda baqylaýshylardy daiyndap, referendýmnyń ótý barysyn qadaǵalap, baiqap kórsek degen ideiany usynamyn. Maqsat– referendýmdy demokratiialyq institýt retinde otandyq modelin qalyptastyrýda úles qosý. Bul men úshin úlken tájiribe bolmaq. Basty mindetimiz referendýmnyń ótý barysyn baqylaý. Qazir bul qoǵamdyq baqylaýdy qalai iske asyra alamyz dep kúni-túni oilanyp, qurylymy men strategiiasyn qalyptastyrýdamyz", - deidi Ol.
