Qoǵam belsendisi Nuraıym Shaqımergen áleýmettik jelidegi jazbasynda jalǵyzbasty ana ekenin jáne qoǵamdyq jumysty balasymen birge atqaryp júrgenin málimdedi, dep habarlaıdy Dalanews.kz.

Nuraıym Shaqımergen – áleýmettik bastamalarǵa belsendi aralasyp, halyqpen tikeleı kezdesýler ótkizetin qoǵam ókili. Ol óńirlerge shyǵyp, azamattardyń máselesin tyńdap, qoǵamdyq qabyldaýlar men kezdesýlerge qatysyp júrgeni belgili.

Óz jazbasynda ol keıde balasyn ózimen birge alyp júrýge májbúr bolatynyn aıtty. Buǵan balany kútýshiniń aýyryp qalýy jáne balasynyń bógde adamdarǵa beıimdele almaýy sebep bolǵan.

«Halyqpen kezdesý keıinge shegerilmeýi kerek, sebebi bul – úlken jaýapkershilik. Sondyqtan keı sátterde balammen birge elge qyzmet etemin», – dep jazdy ol.

Sondaı-aq Nuraıym Shaqımergen jalǵyzbasty analardy álsiz dep qabyldaý qate ekenin atap ótti. Onyń aıtýynsha, mundaı áıelder kóp jaǵdaıda óz qıyndyqtaryn syrtqa shyǵarmaı, jaýapkershilikti tolyqtaı óz moınyna alady.