Bilim jáne ǵylym birinshi vitse-ministri Sholpan Karinovanyń aitýynsha, «Pedagog mártebesi týraly» zań aiasynda búgingi tańda pedagogterdiń eńbekaqysy laýazymdyq jalaqydan 30-dan 50%-ǵa deiin kóterilip, synyp jetekshiligi, tálimgerlik, magistr dárejesi, pánderdi aǵylshyn tilinde oqytý úshin qosymsha aqy kólemi artqan.
Partiianyń sailaýaldy baǵdarlamasyn iske asyrý aiasynda 2023 jylǵa qarai pedagogtardyń jalaqysyn 2 esege arttyrý josparlanýda. Sondai-aq, pedagogikalyq ádep jáne pedagogtardyń quqyqtaryn qorǵaý máseleleri boiynsha arnaiy keńester quryldy.
Eske sala keteiik, buǵan deiin «Pedagog mártebesi týraly» zań jobasy «Nur Otan» partiiasy janyndaǵy Quqyqtyq keńestiń keńeitilgen otyrysynda qaralyp, onda ustazdardyń jumys jaǵdaiyn jaqsartý, olardyń quqyqtaryn retteý, imidjin arttyrý jáne bilim men ǵylymnyń ózge de túiindi máselelerin sheshý jaiy kóterilgen bolatyn.
Otyrys barysynda atalǵan máselelerdi sheshýde oń ózgerister baiqalǵanymen, óńirlerde bilim berý salasynyń sapasyn arttyrýǵa qatysty sharalardy júzege asyrýda basy ashyq suraqtar bar ekeni aityldy.
Qoǵamdyq keńes tóraiymy Juldyz Súleimenova Nur-Sultan qalasynda osy jyldyń sońyna deiin paidalanýǵa berý josparlanǵan mektepter qurylysynyń ýaqytynda aiaqtalmaýy múmkin ekenin alǵa tartty.
Máselen, Uly Dala dańǵyly men 39 kóshe qiylysyndaǵy nysannyń qurylysy múldem toqtap tur. Taǵy 4 mekteptiń qurylysy merziminen keshigýde. Osyǵan bailanysty Juldyz Súleimenova Nur-Sultan qalasy Bilim basqarmasynyń basshysy Shákárim Seisenbaiǵa qatań eskertý jasady.
– Nur-Sultan qalasynda oqýshy oryndarynyń jetispeýshiligi bar. Pedagogtardyń tapshylyǵy da – kún tártibinen túspei turǵan másele, 700-den astam pedagog jetispeidi. Sizdiń tarapyńyzdan máseleni sapaly sheshý úshin eshqandai shara qolǵa alynbaǵan, – dep atap ótti Keńes tóraiymy.
