Nur Otan dárigerlerdiń quqyǵyn qorǵap, emhanalardyń qurylysyn baqylaidy
Densaýlyq saqtaý ministrliginiń ókili Danai Smaǵulovtyń aitýynsha, búginde Nur Otan partiiasynyń sailaýaldy baǵdarlamasyn iske asyrý jónindegi Jol kartasy aiasynda Nur-Sultan jáne Almaty qalalarynda eki ǵylymi-innovatsiialyq kópbeiindi aýrýhananyń qurylysy bastaldy. Aimaqtarda 5 jyl ishinde 20 zamanaýi meditsinalyq ortalyq ashý josparlanýda. Sonymen qatar, barlyq eldi mekenderdi feldsherlik-akýsherlik jáne dárigerlik ambýlatoriialarmen qamtamasyz etý jumystary júrgizilýde.
Osy oraida, partiia keńesi qurylystyń sapasy men merzimin saqtaý jáne salynyp jatqan nysandardy tehnikalyq jabdyqtaý máselelerine salalyq vedomstvo qyzmetkerleriniń nazaryn aýdardy.
– Júrgizilgen monitoring qorytyndysynan «Dárý» Ulttyq ońaltý ortalyǵynyń qurylys kestesi saqtalmaǵanyn kórip otyrmyz. Al jeke meditsinalyq uiymdar men klinikalarda talaptardyń biryńǵai tujyrymdamasynyń bolmaýyna bailanysty halyqqa alǵashqy meditsinalyq-sanitarlyq kómek kórsetý boiynsha «Úidegi dáriger» jobasyna qatysý úshin qiyndyqtar týyndady, – dedi elordalyq keńes tóraiymy Dinara Orazalina.
Partiianyń baspasóz qyzmeti habarlaǵandai, otyrys barysynda Keńes músheleri meditsina qyzmetkerleriniń kásibi jaýapkershiligin saqtandyrý tetikterin jetildirýdi jáne oblystar men respýblikalyq mańyzy bar qalalardyń Qoǵamdyq densaýlyq saqtaý basqarmalary janyndaǵy patsientterdiń quqyqtaryn qorǵaý jónindegi táýelsiz ombýdsmen laýazymyn engizýdi usyndy.
Densaýlyq saqtaý ministrliginiń Ǵylym jáne adami resýrstar departamentiniń direktory Gúlnaz Tańatarovanyń aitýynsha, vedomstvo meditsina qyzmetkerleriniń mártebesin arttyrýǵa, olardyń quqyqtary men múddelerin qorǵaýǵa, eńbek jaǵdailaryn jaqsartýǵa baǵyttalǵan zań jobasyn ázirlegen.
Atap aitqanda, «kinásiz» júiesi bar qoldanystaǵy saqtandyrý kompaniialary arqyly (sotqa deiin ótemaqy tóleý) meditsinalyq qyzmetkerlerdiń kásibi jaýapkershiligin saqtandyrýdy kezeń-kezeńimen engizý josparlanǵan, onda jumys berýshi saqtandyrýshy bolady. Sondai-aq, emdeýdiń «trafarettik» tásil alynyp tastalyp, patsienttermen aradaǵy daýdy retteýmen ainalysatyn mediatsiia qyzmeti engiziledi.
Otyrys qorytyndysy boiynsha Keńes birqatar usynymdar ázirledi. Olardyń qatarynda meditsinalyq quqyq buzýshylyqtar jónindegi normany Ákimshilik kodekske aýystyra otyryp, Qylmystyq kodekstiń 317-babyn qaita qaraý, meditsina qyzmetkerleriniń kásibi jaýapkershiligin erikti saqtandyrýdyń tiimdi tetikterin pysyqtaý jáne t. b. usynystar bar.
