Sondaı-aq, birqatar jas belsendiler bilim berý, densaýlyq saqtaý, áleýmettik qorǵaý salalaryndaǵy jemisti eńbegi jáne COVID-19 pandemıasymen kúreste erekshe kózge túskeni úshin Memleket basshysynyń Jarlyǵymen bekitilgen «Halyq alǵysy» medalimen marapattaldy.
Marapattaý rásimi barysynda «Nur Otan» partıasy Tóraǵasynyń Birinshi orynbasary Baýyrjan Baıbek egemendik jarıalanǵan alǵashqy kúnnen bastap elimizde jastardy qoldaýǵa jáne olardyń óz qabiletin júzege asyrýyna jaǵdaı jasaýǵa erekshe nazar aýdarylǵanyn atap ótti.
Táýelsizdiktiń tańy atqan alǵashqy jyldary kúrdeli ekonomıkalyq jaǵdaıǵa qaramastan, Elbasy, elimizdiń Tuńǵysh Prezıdenti Nursultan Nazarbaev «Bolashaq» halyqaralyq stıpendıasyn taǵaıyndady. Sonyń arqasynda 14 myńnan astam adam álemniń úzdik oqý oryndarynda bilim aldy.
Ótken jyly Memleket basshysy Qasym-Jomart Toqaev Parlamentke jáne jergilikti ókildi organdarǵa saılaý partıalyq tizimderinde jastarǵa kvota belgiledi. Bul olardyń eldegi qoǵamdyq-saıası prosesterge belsendi atsalysýyna yqpal etetin bolady.
Jastardyń ómir súrý deńgeıin jáne áleýmettik jaı-kúıin arttyrý jónindegi naqty sharalar 2025 jylǵa deıingi «Jastar – Otanǵa!» baǵdarlamasynda kórsetilgen.
«Ózderińiz biletindeı, pandemıanyń birinshi tolqyny kezinde 5 myń jasotandyq Elbasy bastamashylyq etken «Biz Birgemiz!» jalpyulttyq aksıasy aıasynda 320 myń otbasyǵa ataýly kómek kórsetti. «Jas Otan» belsendileri Arys pen Maqtaaraldy qalpyna keltirýge de atsalysty. «Jas Otan»-nyń qoldaýymen qurylǵan «Biz Birgemiz!» volonterlik qozǵalysynyń qatysýshylarymen maýsym aıynda ótken kezdesý barysynda «Jastar – Otanǵa!» syılyǵy taǵaıyndalǵanyn jarıalaǵan edik. Biz búgin sony qorytyndylaımyz», - dedi Baýyrjan Baıbek.
Onyń aıtýynsha, partıa jastardyń bastamalaryn, onyń ishinde volonterlikti kótermeleı otyryp, odan ári de jan-jaqty qoldaýdy jalǵastyrady.
Elimizdegi ár aýdan, qala men oblysqa arnalǵan «Jastar-Otanǵa!» baǵdarlamasyn júzege asyrý aıasynda jyl basynan beri volonterlik jumysqa 60 myńnan astam jas tartyldy. Birqatar óńirlerde jastardyń turǵyn úı baǵdarlamalary qabyldanyp, talapkerlerge 75 myń grant bólindi, stýdentterdiń shákirtaqysy 2 esege, al rezıdentter, magıstranttar men doktoranttardyń stependıasy 1,5 eseden astamǵa kóbeıtildi.
Partıanyń jastarǵa arnalǵan saılaýaldy ýádeleriniń oryndalýyn baqylaýdy «Nur Otan» partıasynyń Májilis pen barlyq deńgeıdegi máslıhattardaǵy 600-den astam halyq qalaýlylarynan turatyn Jas depýtattar korpýsy júzege asyrady. Jastar saıasaty salasyndaǵy ózekti máseleler partıanyń respýblıkalyq jáne óńirlik qoǵamdyq keńesteri alańynda da qaralýda.
Partıanyń baspasóz qyzmeti atap ótkendeı, Qazaqstannyń túkpir-túkpirinen 16-35 jas aralyǵyndaǵy 230 adam syılyq laýreattary retinde iriktelip alynǵan. Úzdikterdi anyqtaý úshin qurylǵan arnaıy komısıanyń quramynda Májilis depýtattary, qoǵam qaıratkerleri, blogerler jáne t.b. boldy.
Sonymen, «Úzdik volonter» nomınasıasynda «Biz birgemiz!» aksıasyna belsendi qatysqany úshin Batys Qazaqstan oblysynan Nursultan Qabaev pen Eýropa elderinde granttyq negizde jastardy oqytýdy uıymdastyrǵan shymkenttik Danara Saranova marapattaldy.
«Jyldyń jas qaharmany» atalymynda Jambyl oblysynan kelgen Jaqsylyq Áshirbaev syılyqqa ıe boldy. Ol bıyl tamyz aıynda áskerı bólimniń qoımasyndaǵy órtti sóndirýge qatysyp, jaraqat alǵan.
«Jas Otan» Jastar qanatynyń jyl belsendisi» nomınasıasynda Shyǵys Qazaqstan oblysynan Ásem Shalqarova, Túrkistan oblysynan Nuraıym Qýandyq jáne Aqtóbe oblysynan Álisher Tynyshtyq úzdik dep tanyldy.
«Áleýmettik jelilerde volonterlikti nasıhattaǵany úshin» atalymy boıynsha syılyqty tanymal bloger Janserik Qadyrbaev aldy.
Qan donorlyǵy boıynsha mobıldi qosymsha – «Donorym» jobasy úshin Qaraǵandy oblysynan Rýzı Shıhov «Úzdik stýdenttik joba» nomınasıasyna ıe boldy.
Jyldyń úzdik volonterlik jobalary «Love and Pet Atyrau» jáne «Biz Birgemiz» volonterlik qozǵalysy boldy.
«Jas Otan» Jastar qanatynyń aımaqtyq úzdik fılıaly» nomınasıasy boıynsha Shymkent jáne Nur-Sultan qalalarynyń fılıaldary jeńimpaz atandy.
